ANG opisyal nga gidaghanon sa namatay, sukad kagahapon, sa nahitabong landslide niadtong Biyernes Santo nga milampurnas sa usa ka minahan sa Pantukan, Comval Province miabot na og tulo ka mga tawo.

Kini human nga dugang duha ka patay'ng lawas sa minero ang narekober sa search and rescue team kagahapon sa buntag.

Ang pinakaulahing gikompirma nga namatay giila nga si Marjun Guilabtan, 18, ug Relieto Tabay, 22. Pulos taga siyudad sa Panabo.

Ang mga patay'ng lawas sa mga nahisgutan nakubkuban sa ilawom nga bahin sa tunnel samtang ang rescue operation padayon pa didto sa sub-village Panganason, Kingking village sa Pantukan.

Ang duha maoy apil sa 21 nga nawala hinungdan nga ang opisyal nga listahan sa nangawala moabot na lang og 19 kagahapon.

Samtang trese ka mga minero naluwas sa landslide niadtong Biyernes sa gabii.

Sayo niini gikanayon ni Lieutenant Colonel Lyndon Paniza, gitudlo nga tigpamaba sa militar, nga kon wala silay maluwas nga minero sa Sabado himuon nila ang retrieval inay search and rescue operation.

Apan sa paghinabi niadtong Dominggo, si Paniza nagtin-aw nga ang katapusang desisyon magagikan kang Pantukan Mayor Celso Sarenas kinsa nangulo sa local crisis management committee.

Sa pikas bahin, basi sa natala sa Municipal Social Welfare Development Office sa lungsod sa Pantukan nasuta nga kapin 19 pa ka tawo ang ilang gipangita.

Kini basi sab sa gibutyag sa naluwas nga si Rico Clase nga daghan pa nga mga tawo ang natabunan og mga tinuladang lapok.

Matud ni Clase nga niadtong gabii una pa nahitabo ang pagdahili sa yuta, miuli siya sa ilang panimalay gikan nag-inom ug iyang nakita ang daghang tawo nga misulod sa tunnel aron magmina.

Nagtuo si Clase nga ang mga nahisgutang mga tawo naapil nga natabunan sa pagdahili sa yuta.

Hinuon giangkon sab sa lokal nga kagamhanan sa lungsod sa Pantukan nga dili nila mahatag ang insaktong ihap sa mga molupyo sa maong dapit sanglit sagad sa mga nagpuyo sa maong lugar wala narehistro sa ilang barangay.

Posible sab nga pipila sa mga molupyo mibakasyon aron nga isaulog didto sang Semana Santa. (Ben Tesiorna ug Marvin Pineda)