PUWERTING taasa sa bakasyon. Mao ni pulong sa uban nga namalik na sa dakbayan. Ang uban niingon sab nga puwerting taasa sa penetensya. Sa duha asa man ka nakahimutang?

Bitaw, daghan ta og nakita nga kalihukan sa nilabay nga semana diin atong gibalaan ang pagpasakit ni Kristo ibabaw sa krus. Mga talan-awon nga mahimong sabton nato nga haom sa selebrasyon o tukma sa gihatag nga panahon nga ang uban makabakasyon.

Manghinaot ta nga way kakulian ang tanan nga nibiyahe sa ilang pagpabalik na sa trabaho. Kadtong uban nga nagpabilin lang dinhi sa dakbayan mao sab ni ang atong panghinaot nga tunhay og hapsay ang tanan. Way kakulian, way hasol ug labaw sa tanan, piskay ang panglawas.

Kadyot lang, kadtong namakasyon manghinaot ta nga di na ninyo pun-an pa og laing adlaw pinaagi sa di pagtunga sa trabaho karong adlawa. Mao ni sagad mahitabo. Kung dunay mga adlaw nga way trabaho, ang uban gusto pa og extension. Di baya sayon kining mag kara kara ang imong supervisor kay kuwang sa tawo nga masugo, ilabi na sa mga duty sa gawas sa opisina. Unta di nato pasubrahan kining pagkaabsinos kay luoy sab ang kompaniya o opisina ma-pribado man o gobyerno. Ang 201 file manghinaot inyoha sab nga alimahan.

AHENTE

Nahibalo ko nga dunay daghan diha ang nanginabuhi gawas sa ilang regular nga trabaho.

Mao ni gitawag nga sideline. Pamugas lang gud gihapon sama sa papangahente og produkto o serbisyo. Pero sa inyong mga transaksyon molutaw ba ang inyong pagka ahente o kamo gyud ang negusyante.

Nahisgutan ko ni isip pasidaan sa uban ilabi na kadtong direkta gyud nga naghimo og mga transaksyon para sa usa ka kustomer. Naa man gu’y mga sitwasyon nga paminawon ning uban mura gyud og maoy tag-iya sa negusyo. Ang tinuod diay igo ra sab nga nangahente.

Mao nga nituaw ning pangutana negusyante ka ba o ahente.

Parehas gud sa Mantalongon padung sa Barili, naka kita man siguro mo diha sa daghan kaayong hayop nga ibaligya matag Huwebes. Ang mga tag-iya sa hayop mao ang tinuod nga negusyante. Apan unsay nahitabo ang mga ahente mura na hinuon ang tag-iya sa kabaw nga igo ra man ni nga nagkupot sa pisi samtang nagdala og kustomer. Pila ra man gud unta ang pag-ingon nga igo ra kong nangahente ani.