KAY lagi suki sa kaalaot, lagmit naa’y gatingkagol sa kaminghoy ug dili gyod mopalit sa pagtuo nga kinahanglan pang madedbol aron masinati ang espidno. Pastilan, nia ra kuno dinhi sa yuta ang yawa. Lagmit dag-om ra’y makit-an samtang pabilin nga gisugba sa kawad-on ang kinabag-an, nangitngitan sa abo ug abog sa paglaom. Mahimong igo ra niyang kumoton ug iilo ang panid sa horoscope nga hayan pataka ra ang hayag ang panagna batok sa kapakyas. Ang nahuwasan ug nakaingon og “Success!” basin tuod ang gibati ra’g kagaan gikan sa kasilyas.

Ingon ana pod tingali ang paminaw natong gasaulog duyog sa Kristohanong kalibotan gikan sa kaminghoy sa Semana Santa, nabugnawan ang pahak sa lab-as nga huyohoy sa pagkabanhaw.

Ay, kaluwasan! Alang-alang man pod nga magpalupig ta sa iring sungkaban nga gituohang duna kuno’y siyam ka kinabuhi. Bitaw, ang wala’y pagtuo sa wali mao ra tingali ang nasuya sa wala’y kinutobang pagpahulay sa mga minatay. Gawas kon gutom ta sa gahom sa pagtuo, dili mahimong bahaw ang pagtulon-an sa pagkabanhaw. Samtang madukot ang nasod sa kakabos, padayon pod ang kadaghanan nga dili mapasmo ang pagsalig sa Manunubos.

Kon wala dinhi sa yuta ang paglingkawas sa kalisod, ay, basin makab-ot na gyod ang kahupayan sa sunod kinabuhi. Dili ta kinahanglang mabalaka.

Ug kana, matod pa sa pilosopong pagtuon ni Karl Marx sa katilingbanong kahimtang, mao’y hinungdan nganong ang relihiyon wala kuno’y kalainan sa usa ka opium sa katawhan. Makaadik, makahupay sa mga suliran pinaagi sa paghikalimot. Pasagdi na lang ang pagpangita og kasulbaran pinaagi sa kausaban. Dawaton na lang ang mga panghitabong makaut-ot ug ang mga yawan-ong kahimtang dinhi sa yuta—inhustisya ug uban pang pan-os nga hilisgotan nga haom sa panghupaw ug panghuy-ab—kay mahidangat ra bitaw ta sa langit labi na kon masantos ta gumikan sa pag-antos.

Apan gipadayag pod baya sa atong Katolikong simbahan, sigon sa gipalanog nga pagbatbat sa kataposang pito ka pulong ni Kristo sa niaging Biyernes Santo, nga kinahanglan tang magmatngon ug mahigmata batok sa kapuol sa katilingbanong mga suliran—makaduka kay hagbay ra natong nasayran apan wala gihapo’y kahupayan.

Ambot og duna ba kaha’y witik sa gayunyon nga tabon-tabon ang balaanong pinisik sa laway aron kuratan ta gikan gahagok ug wala’y pagpakabana kun pakiglambigit ning mga panghitabo na tipik ug kabahin sa kapit-os: Ang kalbaryo sa kabanayan nga nataligam-am ang pagbantay sa kabatan-onan samtang nanimpalad ang mga ginikanan sa laing nasod. Ang pagdagsang sa kriminalidad ug ang pagkalansang sa moralidad. Ug ang kakuwang sa katin-awan kabahin sa pagtulon-an aron dili na magpatuyang ang pagpanaghan sa atong populasyon gumikan sa paturagas nga pagpamabdos.(geemyko@gmail.com)