MOKABAT sa 5,000 ka mga tawo ang nisaksi niadtong miaging Biyernes sa Buhing Kalbaryo nga gipasiugdahan sa kagamhanan sa siyudad sa Sugbo.

Ang Buhing Kalbaryo, ang reenactment o buhing pasundayag sa pagsakit ni Kristo tungas sa bukid sa Kalbaryo diin siya gilansang sa krus, nagsugod sa Archdiocesan Shrine sa San Nicolas de Tolentino sa Barangay San Nicolas Proper ug natapos sa Archdiocesan Shrine sa Our Lady of Guadalupe sa Barangay Guadalupe.

Liwas na ang Semana Santa, pero ang Kalbaryo sa katawhan, sa nagkataas nga presyo sa mga palaliton ug sa mga produckto sa lana, nagpabilin pa.

***

Sumala sa ulahing survey sa Social Weather Stations (SWS) nagkadaghan ang mga Pilipino nga nakasinati og gutom.

Nindot alang sa Semana Santa kay giawhag man kita sa pagpuasa. Ang gigutom nang daan, di na kinahanglan pang magpuasa.

Limpyo ang mga sulod sa ginhawaan (tungol ug tina-i) ug ang mga kalag.

Apan lisod kon magpadayon kitag puasa kay way makaon bisag liwas na ang Semana Santa.

***

Usa sa gikatahong nisaksi sa ika-14 nga pagpasundayag sa Buhing Kalbaryo niadtong Biyernes mao si Cebu City Mayor Mike Rama.

Gani, ang iyang anak nga bag-o lang nahimong abogado, si Mikel Rama, maoy nagdala sa papel ni Haring Herodes.

Wa na lang moapil ang mayor kay ang iyang Kalbaryo nagsugod sa wa pang Semana Santa ug magpadayon liwas sa Semana Santa.

Mao kana ang pagsakit kaniya sa nagsigig saway niya ug nagtawag kaniya nga usa lang ka temporaryong mayor sa syudad.

***

Morag mokutoy atong tiyan kon magsigi tag hisgot og puasa. Balhin tas reklamo sa mga namaligyag lechon baboy sa syudad sa Sugbo.

Sa ilang pakigtagbo kang Dr. Alice Utlang, hepe sa Department of Veterinary Medicine and Fisheries (DVMF) sa Cebu City Hall, ilang gihimakak ang pasangil nga ilang laplapan sa unod ang ilang baligyang inasal baboy.

Di sab na maayo nga laplapan sa unod ang lechon kay dyotay na lang ang unod niini unya sakto sa bayad ang customer. Kon kuwang sa unod, mora sab og nagpuasa ang baboy.

***

Usa ka propesor sa University of the Philippines Cebu City (UPCC), Cherry Ballescas, nipada og suwat-reklamo ngadto sa konseho sa syudad bahin sa linaplapay sa lechon.

Sila si Konsehal Margot Osmeña ug Alvin Dizon niingon nga kon tinuod man, makadaot kini sa imahen sa Sugbo. Segurado kong wa ni buhata didto sa lungsod sa Liloan, ilabi na ni Ting Meno Tiro.