DEAR Papa Joe,
Just call me Romel Vincent (AKA RvD). Duna koy problema bahin sa akong kinabuhi karon, nagsugod kini sa akong lovelife. Naa man gud koy uyab sa una. Iyang name kay Bella, taga lungsod sa Alcoy.
After to sa among Christmas party iya kong giimbitar nga maligo daw mi sa beach diri sa among lugar. Naa sad siyay kuyog nga mga kaberkz niya. Daghan kaayo silang gahuwat kunohay nako didto kay gusto lagi silang motan-aw nako! Nakainom na ug nahubog hubog na og gamay. Kining batan-on ta lagi,duna man gyud nay mosipat og mangahobog na. Sa wa damha,ang barkada sa akong uyab nikalit lang og labay og botilya sa akong ulo. Maayo gani kay nakalikay ko, og sa pag-ulang niana, ang akong uyab kalit lang misag-pa kanako ug miyatak.
Sa dihang naulawan na ko,ako pay gihimo nilang sad-an ug kalit lang ningitngit akong panan-aw ug susama ba sa lion ko nga nagbangis tungod sa akong kahiubos kanila, nakakita kog kutsilyo ug dayon akong giluba ang usa nila. Human ko nakagawas sa prisohan tungod sa akong sala, daghan nang mga istorya ug daot bahin sa akong kinabuhi. Nadala sad ko sa akong emosyon ug nisulod ko anang bugoy bugoy ug nipapatik og dakong yawa sa akong buko-buko.
Karon kay naa pa man gyuy mga tawo nga sigeg libak tungod lagi sa akong nabuhat, magsige na lang og padungogdungog. Maayo gani kay makapugong pa ko sa akong huna-huna.
Mao nang ikaw nalang akong napadad-an ani kay wa na gyuy mga tawo nga motambag pa kanako gawas lang nimo. Unsay akong dapat buhaton para mabalik sa normal akong kinabuhi? Daghang salamat.
ROMEL
Dong,
Ang pag bag-o naa ra na nimo. Dili kay sa ingon nagpapatik ka og yawa kay mao na gyud nay nawong niya. Kinsa naman lang ang magpasakop niya nga nawong pa gani daan kahadlukan na. Kana nga mugna mao nay depensa sa tawo nga di na gusto tumban pero kon yawa pa sad ka, di na ka makapugong, oy, nipatay nasad ka.
Wa ko masayod asa gyud ang gusto nimo tabangan. Ang patik ba nga yawa para nimo o ang imong kinabuhi. Ang patik pwede na nimo duwaan og laing desinyo para di halata nga bangis. Ang pag-usab sa kinabuhi naa ra gyud sa imong gusto. Apan sa imong gibuhat sa imong lawas, paghulat na lang sad og nilalang nga modawat nimo ana.
Sa ginakaingon ko na di pa uwahi ang tanan. Daghang salamat sad sa tampo.
PAPA JOE
(ipadangat inyong tampo sa papajoelon @hotmail.ph)