KINING gihimo nga surprise drug test sa Philippine Drug Enforcement Agency (PDEA)-Northern Mindanao sa mga bus drivers diha sa Agora ug Bulua Integrated Bus Terminal sa miaging semana maayo kaayo kon permamentihon.
Duna man konoy memorandum of agreement ang PDEA ug management sa Rural Transit of Mindanao paghimog surprise drug test. Unya ang ubang bus company, dili lang ba diay apilon nato sa programa?
Sa pagkuha pa lang og lisensiya, gikinahanglan ang drug test. Apan dili kana garantiya nga dili mopadayon og gamit kining mga 'adik' kon makakuha na sila og lisensiya.
Mas maayo gyud hingusgan pag-ayo sa PDEA ang ilang kampaniya batok sa mga drug pushers, suppliers ug mga drug lords. Kon dili man maputol ang ugat sa probelma, mas bentahan kon kaminusan nato.
Atong gisangon nalang sa mga operator o management sa mga bus company ang pagpaniid sa mga adik nga driver aron maka-focus ang PDEA niadtong bigtime nga drug dealer.
Tinuod makatabang kining surprise drug test kay pinaagi niana, malikayan ang posibling disgrasya sa kadalanan. Apan, mahimong temporaryo lamang kana kon dili sobsob ang himoong kampaniya sa PDEA.
Kon tumong sa PDEA sa ilang surprise drug test sa mga bus driver mao ang pagpuhag sa problema sa drugas, nan, murag wala kaayo sila maka-bulls eye.
Ambot pa ning gobiyerno nato, nangapo nalang si Lolo ang problema sa drugas wala gihapon masulbad.
Lisod ba gyud sulbahon kining problemaha. Wala man tingali magkulang og pundo ang gobiyerno sa programa batok sa ginadiling drugas. Halos tanang ahensiya sa gobiyerno dunay budget niini - mahimong sa education campaign, rehabilitation ug kining sa operasyon sa mga law enforcement agencies.
Kining negusyo gud sa ginadiling drugas usa ka sindikato, nagpasabot gilangkoban kini og daghang tawo o grupo – mahimong naa sud sa gobiyerno, militar, kapolisan ug mga impluwensiyadong mga tawo. Daghan nang higayon nga dunay mga tawo sa gobiyerno nadakpan atol sa operasyon batok sa drugas. Unya dunay mga pangalan sa dagkong tawo nga nalambigit.
Kon unsa may rason nganong dili gyud mahunong kining problema sa drugas, nasayod na ang tanan. Ang imong tag-an mas insakto pa kay sa akong pangagpas.
Panghinaut lang nato nga dili undangan sa PDEA kanang surprise drug test ug iapil sab nato kining uban drayber sa PUJ.