USA ang patay samtang laing usa ang missing pa ning panahona human nalumos atol sa kasaulogan sa Pagkabanhaw niadtong Domingo sa managlahing dapit.
Dead on arrival sa Polymedic Medical Plaza sa lungsod sa Tagoloan, Misamis Oriental si Angel Rubi, 4, taga-Villagracia sa susamang lungsod.
Sa inisyal nga taho, giingong nalumos ang biktima samtang naligo kuyog ang pamilya sa baybayon sa Sitio Nabulod, Baluarte susamang lungsod.
Tungod kay adunay parte sa dagat nga kantil diin miresulta sa pagkalumos sa bata.
Unang nakaresponde sa biktima ang usa ka hubog nga naligo usab didto sa dapit ug gigakos ang biktima ug wala na gibuhian.
Dihang nakita sa amahan niini, iya dayon nga gibadlong ang maong hubog ug gisukmag hinungdan sa rason nga nagpunga pa ang bata.
Usa pa dayon gidala sa balay tambalanan, apan dead on arrival nga gideklarar sa doktor. Ang haya anaa na sa puloy-anan sa biktima.
Samtang sa laing bahin, usa ka 19 anyos ang missing ning panahona human nalumos dihang naligo sa suba sa Tibasak, Macasandig ning siyudad sa Cagayan de Oro.
Giila ang biktima nga mao si Angelo Villanueva, 19, taga Tobacco, Lapasan ning siyudad.
Si Police Officer 3 Arlene Perolino sa Police Station 9 (PS9) sa Macasandig nibutyag sa Sun.Star Superbalita nga hangtud karon padayon pa ang pag-rescue sa biktima nga wala makita human gituohang naunlod sa dapit.
Nasayran nga naligo ang biktima kuyog ang mga higala nga mga babaye, apan giingong kalit lang kining gikapyutan sa duha ka mga kauban hinungdan maglisod na ang biktima.
Giingong kalit lang dayon kining naunlod ug nawala nga dihang ilang gipangita wala na kini nagpakita.
Gani apil ang Oro Rescue Team ang nagsuhid sa kilid nga bahin sa suba apan pakayas pa ning panahona.
Ang mga ginikanan niini gibati na kaayo ug kabalaka sa nahitabo sa anak. (Stephanie V. Berganio)