DAGHANG mga motorista ang nangreklamo gumikan sa kagrabeng traffic nga nasinate sa lungsod sa Minglanilla niadtong Domingo sa hapon gumikan sa ilang streetdancing nga Sugat Kabanhawan Festival. Niadtong miaging tuig, nakasinati pod ko niini kay didto man ko sa south magsaulog sa Semana Santa. Ang reklamo sa kadaghanan nga gipasirad man ang national highway. Unya didto gipa-agi ang mga motorista sa mga barangay road nga puwerting gubaa ug gamay ra kaayo alang sa mga dagkong sakyanan.
Wala man ta mosupak anang ilang streetdancing o festival kay tipik ug kabahin man kana sa promosyon sa ilang lungsod sa lumad ug langiyaw’ng turista. Pero dili lang pod unta nila i-sakripisyo ang kahimtang sa mga motorista nga miagi pa-ingon sa habagatang bahin sa lalawigan og kadtong mobalik dinhi sa dakbayan sa Sugbo. Niadtong Domingo tingbalik gud to sa nagbakasyon sa south. Panahon nga siguro nga butangan na ni Kong. Eduardo Gulla og coastal o diversion road ang Minglanilla aron dili makamuritsing diha sa national highway kung adunay mga kalihukan.
ATAKI NI PNOY
Kusganong gisaway sa mga lider sa Simbahang Katoliko si Pres. Noynoy Aquino III gumikan sa pag-endorso sa dinaliang pagpasar sa kontrobersiyal nga Reproductive Health Bill. Matod pa ni PNoy atol sa iyang graduation speech sa University of the Philippines niadtong miaging semana, nga iyang paningkamutan nga ma-aprobahan dayon sa Kongreso ang RH Bill.
Mi-ulbo ang kaspa sa mga obispo. Bisan mismo si Cebu Archbishop Jose Palma nagkanayon nga nasubo siya sa maong pamahayag ni PNoy. Mibahad usab ang pro-life groups nga mohimo og sunod-sunod nga mga lihok-protesta kon ipamugos gayod sa administrasyon ang pagpasar sa maong balaodnon nga alang kanila nag-promote sa abortion gumikan sa paggamit og contraceptives.
SUMPAKI
Dili man supak ang simbahan sa family planning. Nagkasumpaki lang sa pamaagi o method nga sagupon sa magti-ayon. Ang gobiyerno gusto sa artificial method kay maoy epektibo.
Mao kanang migamit og mga contraceptives. Ang simbahan gusto sa natural kay maoy haum ug maayo alang sa magti-ayon. Kinsa man ang mabasol ning nagsaka karon nga population sa nasod nga diin miresulta sa problema sa kawad-on ug unemployment? Ang estado ug ang atong mga political leaders? Mao nga dili kita makabasol sa atong mga lider nga mangita og pamaagi nga dili-molubo o moburot ang atong population. Ang simbahan wala man na silay pagpakabana sa katawhan. Busa dili nato mabasol si PNoy nga mosuporta sa RH Bill. (bobby@sunstar.com.ph)