NAOSPITAL ang usa ka lalaki human gipusil sa wa mailhing suspek sulod sa usa ka videokihan didto sa Purok Bayanihan, Barangay Magugpo West, siyudad sa Tagum, Sabado sa gabii.

Nailhan ang biktima nga mao si Capy Miranda, 35, molupyo sa Purok Lemonsito, Barangay Mankilam, siyudad sa Tagum.

Sa report gikan sa Tagum City Police Station, nasuta nga pasado alas 10:00 sa gabii samtang nag-inom ang biktima uban ang mga higala sulod sa usa ka imnanan, nakalalis nila ang wa mailhing grupo sa kalalakin-an nga nag-inom sab sa maong balay imnanan hinungdan nga misangko sa pagsinumbagay.

Apan kalit lamang mihulbot og pistola ang usa sa mga suspek ug gipusil si Miranda gamit ang kalibre .45 nga pistola.

Naigo ang biktima sa nagkadaiyang parte sa iyang lawas ug daling gidala sa Erum Hospital.

Human sab sa hitabo, ang mga suspek abtik nga misibat padulong sa wa matino nga lugar sakay sa og motorsiklo.

Mga miresponding sakop sa kapulisan nakahipos og duha ka basiyo sa kalibre .45 nga pistola gikan sa nahitaboan.

Ang biktima padayon pa karon nga nagpatambal sulod sa ospital. (Marvin Pineda)