USA ka lalaki ang midangat sa tambalanan aron patambalan ang iyang samad nga naangkon human siya gitigbas sa iyang silingan niadtong Dominggo.
Ang biktima mao si Marie Boy Culano, 21, minyo, trisikad driver samtang ang suspek mao si Gerry Dayata, hamtong ang pangidaron, pulos nagpuyo sa Narra Street, Bangkal, siyudad sa Davao.
Base sa spot report sa Talomo Police Station, nahitabo ang pagpanigbas alas 4:00 sa hapon sud sa panimalay sa biktimang si Culano.
Nasayran nga samtang nagpahuway ang biktima kauban ang iyang asawa kalit miabot ang suspek nga nagbitbit og hait nga sundang.
Ang biktima nagbutyag nga gihagit siya sa suspek kinsa nasuko kaniya tungod lamang sa diyutay nga panagbangi.
Si Culano gihapsan og sundang sa suspek mao nga naigo siya sa iyang walang bukton.
Giingon nga nakalikay ang biktima mao nga wa siya naigo sa ikaduhang higayon nga pagtigbas kaniya.
Si Dayata, kinsa hilabihang lagota niadtong higayona, misuway na sab pagtigbas ngadto sa biktima, apan napugngan siya sa asawa ni Culano.
Ang biktima daling gidala didto sa Seventh Day Adventist, apan tungod kay grabe ang iyang samad nga naangkon, gitambagan siya nga mobalhin sa Southern Philippines Medical Center (SPMC).
Sa pagsuwat ning balita, gikatahong padayong gipangita ang suspek sa kapulisan aron sikupon ug taralon sa korte tungod sa sala nga iyang nahimo. (Alger Dura)