DI DIAY ang kapakyas sa Brgy. Kamagayan, dakbayan sa Sugbo, ang pagbayad sa ilang electric bills ang hinungdan sa pagkaputol sa linya sa ilang kuryente kon di ang pagkadiskobre nga way electric meter ug direkta nga nikonektar sa linya sa Visayan Electric Company (Veco) kun nag-illegal wiretapping.

Si Ethel Natera, tigpamaba sa Veco, nipasabot atol sa pagpakighinabi sa Sun.Star Superbalita, nga nipahigayon sila og random inspection sa barangay gumikan sa report nga naghitak ang kinawatay sa kuryente.

Didto ilang aksidenteng nakit-an ang Kamagayan barangay hall nga way metrohan sa kuryente hinungdan nga diha-diha giputol sa taga Veco uban sa mga balay nga illegal usab nga nikutay sa kuryente.

Si Catherine Braga, barangay treasurer, nagkanayon nga lima na ka tuig nga way electric meter ang ilang barangay gumikan sa paltos nga pag-install sa Cesai, accredited contractor sa Veco sa linya sa ilang kuryente.

Si Natera nagkanayon nga ang gibuhat sa Barangay Kamagayan usa ka kalapasan sa R. A. 7832 o Anti Pilferage Act. Ilawom sa R.A. 7832 ang mapamatud-an sa korte nga nakalapas sa balaod makamulta og di molapas sa P100,000.

Matod ni Natera nga niabot og P 301,280.25 ang kinatibuk-ang bayranan sa Kamagayan apil na ang surcharge nga P1,200 ug P5,000 nga inspection cost ug di kapin sa P200,000 base sa pamahayag ni Kapitan Celestino Avila.

Si Natera nipadayag nga di mahibalik ang kuryente sa barangay hall kon di mabayran ang maong utang.

Hinuon si Braga nagkanayon nga andam mobayad ang ilang barangay pinaagi sa data-data.

Gidugang niya nga nakigkita na usab si Avila kang Mayor Michael Rama kabahin sa maong problema.

Kon makabayad na ang Kamagayan, ang Veco nay motaod sa ilang kuryente.