SIKYU namatay human gipusil sa usa sa duha ka mga tulisan nga nanulis sa Phoenix Gasoline Station sa Brgy. Tayud, lungsod sa Consolacion, Sugbo.

Si Rolly Broca, 32, buwag sa kapuyo, taga Canduman, dakbayan sa Mandaue, lumad nga taga Tabogon, namatay dihadiha human nakaangkog duha ka mga samad pinusilan sa dughang nga nilapos sa iyang lawas ug laing samad sa walang bahin sa lawas.

Ang duha ka mga tulisan pulos nag-bonnet gikatahong nagsakay sa kolor itom nga XRM nga motorsiklo ug nag-helmet og kolor blue, samtang ang kauban nagsul-ob og hood nga kolor itom nga nagdala og sub-machine pistol nga KG9.

Nadala sa duha ka mga tulisan ang gibana-banang kapin sa P100,000 nga kita sa gasoline station atol sa ilang pagsibat sa wa na masutang direksyon.

Si Chief Insp. Teodolfo Manatad III, hepe sa Consolacion police nga nahinabi sa Sun.Star Superbalita, nagkanayon nga ang duha ka mga tulisan sakay sa motorsiklo mga alas 2:00 pasado kagahapon sa hapon dihang niabot sa gasoline station.

Ang angkas nga nagdalag KG9 nanaog ug kalit nga niduol kang Broca, kinsa nagbarog duol sa cashier ug nideklarar niinig tulis.

Ang tulisan nidemanda sa gwardiya sa paghatag sa .38 caliber revolver, apan wa gyud siya mosanong hinungdan nga nahitabo ang ilang inilogay.

Apan nakapabuto sa iyang armas ang tulisan.

Nakadagan si Brocka paingon sa opisina sa gasoline station mga 5 metros ang gilay-on gikan sa cashier.

Apan gipabuthan siya makadaghang mga higayon ug naigo dayon nahagba human natusaktusak sa bala ang kalawasan niini.

Ang tulisan nisulod sa opisina sa gasoline station ug gitiunan og armas ang tag-iyang managtiayon nga sila si Myla Noel ug banang si Chito, taga Lamac, Consolacion ug gikuha ang P100,000 nga kita.

Matod pa ni Manatad nga way nahimo ang managtiayon tungod sa kahadlok ingon man ang supervisor niini.

Ang duha ka mga pump boy ug cashier gipahapa.

Daling ningsibat ang duha ka mga tulisan sakay sakay sa itom nga motorsiklo ug wa na maabti pa sa mga pulis sa Consolacion.

Gidala sab sa driver sa motorsiklo, kinsa armado og revolver, ang service firearm sa sikyu.