NIBAWOS sa pagpasakag reklamo sa Office of the Ombudsman kagahapon ang mayor sa dakbayan sa Danao batok sa bise mayor ug sa tanang mga sakop sa konseho nga nahaunang nipasaka niyag reklamo.

Kasong kriminal ug administratiba ang gisang-at ni Danao City Mayor Ramon “Boy” Durano Jr., Danao City Cooperative Officer Juanito Mata ug Administrative Assistant Lydio Roble batok nilang Bise Mayor Ramon “Nito” Durano III lakip ang tanang mga sakop sa konseho resulta sa pagpasar niini sa City Ordinance No. 55-10 nga nag-usab sa pipila ka mga buhatan sa kagamhanan sa dakbayan.

“Ordinance 55-10 is null and void... and a product of highly politicized Sangguniang Panglungsod, a clear example of an abusive local legislative body which has no other purpose but to undermine the governance of City Mayor Ramon “Boy” Durano…,” nagkanayon ang gisang-at nga 17 ka pahina nga reklamo.

Nitataw siya nga di lang ang iyang buhatan ang nadaut niini kon di nalakip usab silang Mata ug Roble ug ang tanang mga molupyo sa Danao kay ang ilang gipasakahag kaso “are supposed to serve without political consideration.”

Si Mata maoy cooperative officer sa siyudad samtang si Roble maoy administrative assistant diin naapektuhan ang ilang buhatan tungod sa pagpalabang sa ordinansa.

Matod ni Danao City Legal Officer Gloria Lastimosa-Dalawampu nga daghan pang mga kaso nga ilang ipasaka batok kang Nito ug sa mga sakop sa konseho tungod sa giingong pangabusar sa katungdanan nga gipunting aron di ma-terrorize ang pangalagad sa mayor.

Sa linaing pakighinabi, si Danao City Councilor Jorge John Cane namahayag nga ang gipasakang reklamo batok nila bawos sa ilang mayor kanila human gipasakahan nilag reklamo tungod sa kapakyas niini sa pagpirma sa ilang voucher sa gipangayo nilang pundo sa biyahe nila sa Philippine Councilor’s League sa Manila.

Matod ni Cane nga request sa ilang mayor ang pag-abolish sa pipila ka mga buhatan sa kagamhanan.