PARTE na sa blotter matag-adlaw ang pagpanguot ug pagpanglabni nga matala niini sa bisan asang presintuhan ning siyudad sa Cagayan de Oro.

Sa Police Station 2 (PS2) sa Cogon kasagaran sa natala mao ang kaso sa pagpangawat, pagpanglungkab ug uban pa.

Ning bag-o, nagpatala ang usa ka babaye human gikawatan niadtong Lunes mga alas 8:00 sa gabii sa Osmeña-JR Borja ning siyudad.

Ang biktima nga mao si Merlita Ebalde, 29, minyo, taga-Barangay 34, ning siyudad nisaysay sa mga pulis nga nawala na ang iyang pitaka dihang iyang gibutang sa iyang shoulder bag.

Gibutyag niini nga siya naulwan dihang pagpalit ug mobayad na unta wala na sa iyang bag ang iyang pitaka nga adunay sulod nga nga P6 mil.

Gidudahang ang iyang tupad nga batan-on nga nagpatuo usab nga kostumer sa dapit maoy suspek sa pagpangawat niini. Ang kaso pending sa PS2 ning panahona.

Samtang biktima usab sa pagpanglabni si Cherry Lane Hermosa, 21, dalaga, taga Purok 3B, Gusa ning siyudad.

Gisaysay sa biktima sa PS2 sa Cogon nga igo lamang siya nga nagbaklay sa dalan Justo Ramonal dihang kalit lang nga gilabni ang iyang bag nga adunay sulod importaneng mga butang sama sa cellphone, pitaka ug mga importanteng dokumento. Adunay kwarta nga mobalor og P500.

Ang kaso padayon pang gisunod sa kapolisan ning panahona labina gituohang mga rugby boys ang responsible sa mga pagpanglabni ug pagpangout sa dapit. (Stephanie V. BerganioP)