DUHA ka managlahing pagpangdunggab ang nahitabo niadtong milabay’ng adlaw nga natala sa balay tambalanan ning siyudad sa Cagayan de Oro.
Nadala sa balay tambalanan si Raymond Dardo, 26, minyo, ug lumulupyo sa Talisay, Gingoog City, Misamis Oriental human kini dunggaba sa usa ka lalaki niadtong Martes alas 5:00 sa hapon.
Samad dinunggaban sa kilid ginamit ang kutsilyo ang naangkon sa biktima human kini dunggaba sa suspetsado nga naila lamang sa alyas nga Rogelio.
Subay pa sa biktima nga nag-estorya lamang sila ug suspetsado sayo sa buntag apan wala magkasinabot ug nagkabingkil nga niabot sa pagpangdunggab.
Kasamtangang nagpaalim ang biktima sa Northern Mindanao Medical Center (NMMC) ning siyudad.
Ang kaso giduso na sa kapolisan sa nasangpit nga lugar diin nahitabo ang maong insidente.
Samtang usa usab ka lalaki ang nilanding sa NMMC human dunggaba sa iyang kainom mga alas 12:15 sa tungang gabii sa San Roque, Barangay Lapasan ning siyudad.
Giila ang biktima nga si Oliver Bartolata, 47, minyo ug residente sa susamang dapit diin nahitabo ang maong pagpangdunggab.
Matod sa asawa sa biktima nga samtang nagtagay sa ilimnong makahubog ang biktima ug maong suspetsado ug sa dihang nangahubog na nagbikil sa mga estorya ug miresulta sa pagpangdunggab niini.
Ang biktima nakaangkon sa samad dinunggaban sa iyang wala nga bahin sa dughan ug samad sa likod nga kasamtangang nagpaalim sa balay tambalanan.
Sa pagsulat ning balita, ang suspetsado gawasnon pa ug padayon nga gisunod sa kapolisan ang maong kaso.