MOKABAT na sa 11 ang patay sa pagsuka-kalibang nga nasinati sa pipila ka mga residente sa Barangay Tignapoloan, ning siyudad sa Cagayan de Oro.
Si Kapitan Renato Rances sa maong barangay nga nahinabi sa Sun.Star Superbalita niiingon nga unom sa mga biktima ang nadala sa JR Borja Memorial Hospital, apan nakabsan gyod sa ilang kinabuhi ug upat sa mga residente ang wala na nadala sa balay tambalanan.
Nagpadayon ang maong sakit diin kini nagsugod pa niadtong bulan sa Enero ug hangtod ning bulan, pipila gihapon ang nakasinati sa suka-kalibang, apan naabagan na human dali sab nga miaksyon ang CitY Health Department ning siyudad uban sa mga personahe nga kanunay magsusi sa mga nasakit niini ug naghatag sa mga tambal.
Si Rances niingon nga nabalaka siya pag-ayo niining maong pagsuka-kalibang sa iyang mga sakop tungod kay wala man nila masuta kung asa nagumikan ang maong sakit.
Nasayran nga kasagaran sa mga nasakit niini residente sa tumoy na nga bahin sa Tignapoloan ug boundary na sa Lanao del Sur ug didto na usab manginabuhi.
Tungod sa kabukid na nga bahin uwahi na kaayong makapatambal sa pagtuong normal lamang kini nga gibati.
"Imbes hinuon nga dalahon na sa doctor, nakabsan naman hinuon sa ilang kinabuhi," ni Rances.
Gani gisuwayan pa ni Rances ang pagbinisaya kanila sa pagtuong adunay nagdala sa mga dautang spiritu.
Kasagaran sa mga namatay nag-edad og 25 anyos pataas ug usa lamang niini ang nag-edad 12 anyos paubos.
Hinuon, gipasabot ni Rances nga usa sa problema sa maong dapit mao ang kakulang sa ilang mga pansayan ug giingong daghan gyod sa mga residente nga bisan asa na lamang magpabuhagay sa ilang mga hugaw.
Gihimakak usab sa kapitan ang pagtuong nagumikan sa ilimnon nga tubig tungod kay limpyo ang tubig ug 30 ka tuig na nga maoy tinubdan nga ilimnon sa mga tawo ang maong reservoir sa dapit.
Ang midwife nga nadestino sa dapit nanawagan sa mga residente nga kung mahimo maglimpyo sa palibot ug maghimo sa ilang kaugalingon nga mga pansayan aron wala nay kagaw nga posibleng maoy hinungdan sa pagsuka-kalibang sa pipila ka mga residente sa dapit nga miresulta usab sa ilang kamatayon. (Stephanie V. Berganio)