TUNGOD sa cell phone, nahabwa ang tinai sa ugangan ug namatay human gidunggab og sundang sa iyang umagad dihang iya ning giuwang sa lalis tali sa ilang silingan sa miaging gabii sa Sitio Katiwihan, Barangay Tolosa, lungsod sa Malabuyoc.

Si Florencio Quintinita, 60, minyo mag-uuma, dead-on-arrival (DOA) sa tambalanan sa nahisgutang lungsod human nakaangkog samad sa tiyan nga nilapos sa likod ug nahabwa ang iyang tinai.

Gitumbok nga suspek si Marlon Duhaylungsud Jesalva, 40, mag-uuma, lumad nga taga Zamboanga City, kinsa ni-surrender human sa krimin dala ang sundang nga iyang gigamit sa pagpatay.

Samtang samdan usab sa nagkada-iyang parte sa iyang kalawasan ang barangay tanod nga si Joselito Auza, human nadunggaban apan nakalingkawas sa kamatayon human nakadagan.

Si Auza maoy unang gikaaway ni Jesalva.

Si Sr. Insp. Amedeo Pepito, hepe sa Malabuyoc Police nga nahinabi sa Sun.Star Superbalita, niingon nga ang suspek niadto sa balay ni Auza niadtong alas 7:00 gabii sa Domingo.

Giingong gikomprontasi niini ang tanod human dunay mga tabi-tabi sa dapit nga ang cell phone ni Auza nga nawala giingong dunay nakakita nga toa sa anak sa suspek.

Tungod sa kalagot sa suspek nga gipasanginlan ang iyang anak nga nagkuha sa cell phone sa tanod, iya kining giadto sa balay hinungdan nga nahitabo ang ang ilang mainitong komprontasi.

Si Florencio nga nakakita sa panaglalis, nibadlong sa iyang umagad aron di na modako ang ilang away.

Apan ang suspek naglagot na hinuon, niibot sa iyang sundang nga gitakin sa iyang hawak ug gihansakan ang tiyan sa iyang ugangan hinungdan nga maayong pagkahabwa sa tinai niini.

Wa matagbaw gisunod usab niini sa pagtigbas ang barangay tanod kinsa nakaangkog samad sa iyang lawas ingon man tuhod.

Hinuon naluwas sa mga silingan human nakadagan palayo sa lugar.

Ang mga biktima gidala sa mga silingan ug kapulisan sa tambalanan sa lungsod apan way swerte si Florencio tungod kay gideklarar sa mga doctor nga DOA samtang ang tanod maayo na ang kahimtang.

Ang suspek kinsa bulontaryong ni-surrender sa kapulisan ingon man sa sundang nga iyang gigamit sa pagpatay human siya nakonsinsya sa iyang gihimong krimin.

Gipasakaan na hinuon sa tukmang kaso kagahapong adlawa nga kasong homicide.