HIKABSAN sa kinabuhi ang usa ka lalaki human nga gipusil sa duha ka wala mailhing suspek didto sa terminal sa lungsod sa Montevista, Comval Province, Lunes sa gabii.
Nailhan ang biktima nga mao si Richard Bagaan, 40, molupyo sa Purok 6, Barangay Poblacion, lungsod sa Montevista.
Sa report gikan sa Comval Province Police Provincial Office nasuta nga nahitabo ang pagpamusil pasado alas 10:40 sa gabii samtang si Bagaan naghuwat sa bus terminal sa Purok 5, Barangay Poblacion. Apan kalita siyang gipusil sa duha ka wa mailhing mga suspek nga nakamotor gamit ang kalibre .45 nga pistola.
Nakahiagum og daghang samad pinusilan sa kalawasan ang biktima hinungdan sa iyang hinanali nga kamatayon.
Human sa pagpamusil mga suspek abtik nga misibat padulong sa wa matino nga lugar sakay sa ilang get-away nga motor.
Narekober didto sa crime scene ang mga basiyo sa bala sa kalibre .45 nga pistola nga maoy gituohang gigamit sa mga suspek.
Gilusad na sa kapulisan ang man-hunt operation batok sa mga suspek. MARVIN PINEDA