MGA molupyo nga naa sa Sityo Panganason, Barangay Kingking, lungsod sa Pantukan, Comval Province hingpit nang napahawa tungod sa kapeligro sa ilang kahimtang human mahitabo ang pagdahili sa yuta sa maong dapit.

Kini maoy gisulti ni Bong Lantaya, spokesperson sa Municipal Disaster Risk Reduction Management Council MDRRMC sa lungsod sa Pantukan.

Matud ni Lantaya nga Martes sa hapon mibiya ug gipangguba na sa mga katawhan ang ilang mga balay ug mibalhin sila sa luwas nga lugar subay sa mando sa lokal nga kagamhanan.

"As of this moment wala nay mga molupyo ang nagpabiling sa maong lugar, gipangguba na sab nila ang ilahang mga panimalay aron mubakwit", butyag ni Lantaya.

Gisulti sab ni Lantaya nga andam na ang mga rescue team nga mohimo og retrieval operation aron subling mokalot sa nahabilin pang nalubong sa landslide kon dunay "go signal" na sa Mines Geoscience Bureau.

Kahinumdoman nga 13 na ka mga patay'ng lawas ang narekober sa midahili nga yuta pasado ala 1:00 sa hapon niadtong Martes.

Matud ni Lantayan nga tungod sa pag-ulan nga nasinati niadtong Lunes sa gabii, nakankan ang yuta hinungdan nga migimaw ang patay'ng lawas sa laing lima ka mga biktima.

"As of kagahapon sa hapon (Martes) dunay lima ka mga patay'ng lawas ang narekober, nakit-an kini sa mga kabanay tungod migimaw ang ilang kamot...., miulan man god niadtong Lunes gabii ug nakankan ang yuta", sulti ni Lantaya sa paghinabi sa RMN-dxDC ug Superbalita.

Wa pa sab makuha ang usa sa mga biktima nga nalubong tungod sa peligro sa lugar ug wa na gidayon sa mga nagpahiagyon og retrieval operation ang pagkalot.

Ang upat ka mga biktima nailhan nga mao sila Vincent Balog, Junel Lapates, Noe Caincoy, ug Jericho Escoto, samtang ang usa ka wa pa makalot, wa pa sab mailhi hangtud sa pagsuwat ning balita.

Mga molupyo sa maong lugar ang nakarekober sa patay'ng lawas sa laing lima ka mga biktima human temporaryo una nga mipahulay ang mga rescuer tungod sa mando sa lokal nga kagamhanan tungod sa ka peligro sa lugar.(Marvin Pineda)