Thursday ugma. Bulan sa Mayo na usab.
Ika-limang bulan sa tuig ang Mayo, bulan sa pagbakasyon, kay ting-init na... duol na, pipila na lang ka adlaw gikan karon, ang bulan sa mga kapistahan, Espoko mo didto lamang sa probinsya sa Bohol nga may ubay-ubay kita nga mga kagupa didto gikan sa lungsod ug baryo sa Lila, Ubay, ug Jagna gikan sa petsa 1, usa ka bulan kini hangtud sa kataposan may kapistahan gyud nga pagsaulog matag adlaw ingon man sa uban natong silinganang dapit diha sa Gusa, 15, Balingoan, 29, Medina 15, baryo Sibantang, 28 ug siyudad sa Gingoog, 22.
Gitawag usab kini nga bulan sa mga bulak, kalihukan sa mga kabataan diha sa atong mga simbahan ug kapilya ang gi-obserbar nga "Flores de Mayo" paghalad sa Mahal nga Birhen diin pagatak-upan kini sa katapusan pinaagi sa usa ka prosesyon uban ni Reyna Elena ug ubang karaynahan diha sa mga komunidad.
oOo
Sa pagsugod usab sa Mayo 1, Labor Day, fiesta ofisyal, adlaw sa mga mamumuo, aduna gihapon ilang gikatakda nga panagtigum o rally didto sa kaulohan ug ubang dapit sa nasud, aron ila usab ipadangat ang ilang mga yangungo ngadto sa atong pangamgamhan sa pagpatuman sa angay nilang suholan nga madawat o pagpauswag sa ilang suholan, bugti sa ilang gikahatag nga serbisyo ngadto sa ilang tagsa-tagsa ka nga mga agalon o amo mga parekoy.
oOo
rUg sa ubang kalihukan sa bulan sa Mayo - sa natad sa internasyonal nga pamoksing, karon sa Mayo 7 na ang gipaabot nga PACQUIAO vs SHANE MOSLEY sambunot fight didto sa MGM Grand Garden sa Las Vegas, USA ipahigayun.
Samtang dinhi sa atong rehiyon, andam na usab ang atong 381 ka mga atleta nga maoy morepresentar sa Northern Mindanao didto sa Palarong Pambansa nga ipahigayun didto sa Dapitan City, dinhi sa Mindanao karong Mayo 8 hangtud sa 14.
Samtang didto sa kaulohan, ang impeachment proceeding batok ni Ombudsman Merceditas Gutierez himoon na sa dili madugay pagadumalahon kini sa mga maayong laki ug honorableng sakop sa Senado diin sila ang mahimong ginoo ug ginang hukom sa kapalaran ni Tita Mercy kun siya magpabilin ba sa gihuptang puwesto nga iyang nakuha sugod pa sa kapanuhan ni PGMA.
Paabot na lang kita mga parekoy, sa linugdanan niining umalabot nga zarzuela o mahimong dula unya sa entablado, sumala pa sa mga oposisyon.
Nakadawat kita sa mga inspiring messages ug sulat pinaagi sa koreyo ug Internet gikan sa atong mga bag-o o kanhi mga higala, klasmit ug relatives in other countries na; nagpahibalo nga nahimuot sila sa ilang nabasa sa mga ulahing mga panghitabo dinhi sa siyudad, sa miaging pag post nato sa SS Super Balita, ngadto nila ni Sue Cepeda, ang mga Butra sisters, Elvi, Ging, Rox, Ednamae ug Bambie; Ppet Ilogon, Dwight Alcantar, Cheet ug Joe Garrido, Tony Aberilla, Ging Veloso, Dward Binanay, mediaman kanunay Ben Emata and lately from klasmit Larry Docdocil from Woodside, New York best wishes ug maayong panikay sikay kaninyo, hibalo pa ba mo mag Binisaya? Wala na man kitay espasyo mga igan ug parekoy hangtud sa sunod... 0905-833-2864