KARONG adlawng Domingo, takdo sa kasaulogan sa Labor Day, laing march rally ang ipahigayon sa mga transport group uban sa rekureda libot ning siyudad sa Cagayan de Oro.
Gibutyag ni Sonny Hinosolango kinsa Secretary General sa Solidarity of Transport Alliance sa Northern Mindanao (Starex-Piston) nga kining march rally sugdan sa Capitol ground ug tapuson sa Divisoria.
Usa sa gustong ipaabot sa maong grupo ngadto sa kagamhanan mao ang pagtaas sa suholan sa mga trabahante ug labaw sa tanan ang pagbasura gayud sa Oil Deregulation Law nga maoy hinungdan nga nawad-an og kontrol ang gobiyerno sa presyo sa produktong petrolyo ug padayon kini sa pagsaka nga kung anaa man ang pag-ubos pila lamang ka sentimos ug dili gihapon makatabang sa kalisod sa mga driver.
Apil sa panawagan ang pagbasura sa Value Added Tax sa mga petroleum products nga giingong adunay tag P7 matag litro nga maoy usa sa hinungdan sa kataas sa presyo sa lana.
Wala usab gikalipay sa grupo ang P3.00 per liter fuel subsidy nga giaprobahan ni Presidente Benigno Aquino III ug giingong wala gyod kini nakatabang sa mga driver ning panahona.
"Wala man nako nabati nga nakatabang kanako isip usa ka driver ang P3 nga fuel subsidy, mao rman gihapon," si Renato Dumurog, driver nga taga-Osmeña Extension nga nainterbyu sa Sun.Star Superbalita.
Giawhag ni Hinosolango ang pipila ka mga driver sa pagsalmot kanila tungod kay ang tanan niini nga hangyo alang ra usab sa ilang kaayuhan. (Stephanie V. Berganio)