MOKABAT sa 18 pa lamang nga mga driver ang nakuhaan og drug test sa mga sakop sa Philippine Drug Enforcement Agency (PDEA)-Northern Mindanao sa usa ka libo nga mga driver sa bus ning siyudad sa Cagayan de Oro.
Unang drug test nahitabo niadtong Semana Santa sa Agora ug Bulua Integrated Bus Terminal ning siyudad ug nasurprisa niini ang pipila ka mga driver.
Sa pakighinabi sa Sun.Star Superbalita ngadto kang Juliet Cagaanan kinsa Information Officer sa PDEA-Northern niingon nga surprisa ang pagkuha og drug test sa mga driver ug dili kinahanglan mahibaw-an sa mga driver ang petsa niini aron usab nga dili makabantay labina gikatakdang adunay laing drug test nga himuon kanila.
Mokabat sa usa ka libo ka mga driver ang kuhaan pa og drug test, apan 18 pa lamang ang nakuhaan ug ang resulta kasamtangan usab nga gitago labina kung kini magpositibo.
Ang pagkuha og drug test kanila usa ka Memorandum of Agreement tali sa Rural Transit Mindanao Incorporated ug PDEA-Northern Mindanao.
Kini human sa pipila ka mga reklamo nga dunay mga bus driver nga tiggamitan og ginadiling druga.
Sa laing bahin, usa ka babaye ang nakasibat human gihimo sa PDEA-Northern Mindanao ang buy-bust operation niadtong Martes mga alas 4:00 sa hapon sa lungsod sa Opol, Misamis Oriental.
Usa ka target list nga drug personality sa PDEA nga giilang si Lauli C. Zosa alyas "Mother Lily", 50 anyos, ang nakasibat human sa operation, apan nakuha sulod sa puloy-anan niini ang pipila ka gramo sa gituohang shabu nga adunay gibug-aton nga 27.3 gramo mobalor og P324 mil.
Ang nakuhang illegal nga druga dalahon sa PNP Crime Laboratory alang sa masuing eksamin. (Stephanie V. Berganio)