LAWAS sa otso anyos napikas, nabuwag ang ulo ug kamot dihang nalatayan sa ligid sa Isuzu truck cargo closed van nga gikan nag-deliver og isda sa dakbayan sa Sugbo.
Ang biktima kalit nga nilabang mga alas 12:50 kagahapon sa udto sa Bawo Bridge National Highway sa Barangay San Jose, lungsod sa Catmon, Sugbo hinungdan nga nadasmagan.
Wa na mahitsura nga pisat ang ulo ug nawong sa biktimang si Janlou Alolor, tinun-an sa grade 2 sa maong lugar, ug namatay diha-diha gilayon.
Ang nakadasmag mao si Ranilo Bacari, 57, minyo, taga Barangay Poblacion, lungsod sa San Remegio, driver sa Isuzu truck cargo closed van (GXJ-960) nga gipanag-iya sa negusyanteg isda nga si Diosdado Ursal, taga lungsod sa San Remegio.
Si SPO2 Rex Menchavez, desk officer sa Catmon police, nga nahinabi sa Sun.Star Superbalita, nagkanayon nga ang cargo truck nagpaingon sa San Remegio gikan nag-deliver og isda sa Pasil, dakbayan sa Sugbo.
Si Alolor naglakaw sa daplin sa dalan sa walang habig, apan kalit nga nilabang sa pikas habig hinungdan nga wa na maka-brake ang driver sa truck ug nalatayan sa ligid sa atubangan ug luyo hinungdan sa pagkapisat niini.
Si Bacari didto na ni-surrender sa kapulisan sa lungsod sa Sogod ug gi-turnover sa kapulisan human sa insidente.
Matod pa ni Menchavez nga ang biktima giingong igo lang ni-apas sa iyang maguwang nga nangahoy aron papauli sa pagpaniudto.
Apan wa siya makabantay sa iyang paglabang nga dunay truck nga nagpaatubang kaniya.
Di kusog ang dagan sa sakyanan apan tungod kay nalatayan ang biktima hinungdan nga maayong pagkapisat sa ulo.
Gani nabuwag pa ang kamot niini sa lawas, matod ni Menchavez.
Hinuon kagahapon sa hapon ilang gibuhian si Bacari human niabot ang mga representante sa kompaniya niini sa isda, ingon man ang ginikanan sa bata nga sila si Jessie ug Anabel Alolor nagkasabot.
Sumala pa niini nga dunay gipirmahan ang mga representanti sa tag-iya sa delivery truck ug ginikanan sa biktima nga di nalang mopasakag kaso ug abagahon ang tanang gastuhan sa pagpahiluna sa lawas sa bata.