NIREKOMENDAR ang Cebu Provincial Prosecutor’s Office nga si Medellin Mayor Ricardo Ramirez pasakaag kasong reckless imprudence resulting in homicide sa kamatayon sa usa sa mga sakop sa mayor’s squad sa miaging tuig.

Ang piskaliya nitumbok nga may igong basehanan nga si Ramirez pasakaag kaso sa korte tungod sa kamatayon ni Edilberto Abao, nga imbis ang iring maoy gipusil, ang bala didto moigo sa tuong paa sa biktima.

Niini, nagtinguha si Ramirez nga ipa-review sa Department of Justice (DOJ) o sa buhatan sa Regional Prosecutor’s Office apan makig-estorya pa siya sa iyang abogado sa sunod lakang niyang buhaton.

“Wa pako makadawat og kopya (sa resolosyon) pero definitely bisan wa pami magka-estorya sa akong abogado, ako nang ipa-review,” matod sa text message ni Ramirez nga gipadala sa Sun.Star Superbalita kagahapon.