NAPUTOL ang kamot sa usa ka lolo nga namatay samtang naangol ang iyang asawa ug apo human gilabay og granada sa tulo ka mga lalake ang ilang karenderya kagahapon sa ala 1:20 sa hapon sa Sitio Ponce II, Brgy. Carreta, dakbayan sa Sugbo.
Si Eduardo Natividad, 67, minyo dead-on-arrival (DOA) sa Cebu City Medical Center (CCMC) ug naputol ang walang kamot ug nakaangkog daghang mga samad sa lawas tungod sa pagbusikad sa granada.
Maayong pagkabungkag sa ubang parte sa karenderya sa biktima samtang ang mga sakop sa Crime Scene Investigator (CSI) nakapunit og mga tipaka sa granada ingon man gagmay nga mga unod sa tawo nga kabahin sa kamot sa biktima nga naputol.
Ang asawa ni Eduardo nga si Roseta 67, nakaangkog samad sa tangkugo ug ubang parte sa lawas, nagpabilin sa pribadong tambalanan uban sa ilang nga si Mark Vince, 7, kinsa samdan sa tuong tiil.
Giingong dunay nahitabong komprontasi sa sulod sa karenderya tali sa mga biktima ug sa suspek una pa niulbo ang granada.
Ang biktima giingong nipunit sa granada dihang gilabay sa suspek sa pamasin nga di kini mobuto apan dihang iyang nakuptan kalit nga ni-ulbo hinungdan nga naputol ang iyang walang kamot ug natusaktusak sa mga tipaka ang ubang parte sa kalawasan.
Si SP03 Rey Cuyos, imbestigador sa Homicide Section sa Cebu City Police Office (CCPO) nga nahinabi sa Sun.Star Superbalita niila sa mga suspek nga sila si Alvin Cabang, 24, ulitawo nagpailang trabahante sa Mactan Export Processing Zone, taga Sitio Fatima, Barangay Jubay, Lilo-an ug si Eldie Prisco Mahinay, 40, ulitawo, habalhabal driver, taga Sitio Cabangkalan, Barangay Jubay.
Si Cuyos niingon nga si Cabang diha nila madakpi sa dakbayan sa Mandaue duol sa taytayan sa Mactan human sa insidenti dihang nisakay sa usa ka mini bus, samtang alas 4 pasado kagahapon sa hapon nasikop usab nila sa follow-up operation si Mahinay sa Brgy. Jubay, Liloan.
Matod niya nga drugas ang anggulo sa imbestigasyon nga ilang gisubay base sa ilang nakuhang impormasyon gikan sa pamilya sa biktima.
Si Cuyos niingon nga si Salome Bueno, hingkod, inahan sa 7 anyos ug anak sa mga biktima, nibutyag nga si Rodrigo “Badang” Cansancio, 45, taxi driver, maoy tuyo sa mga suspek.
Niadto pang Abril 17 sa miaging Dominggo gipangita.
Si Salome nibutyag nga si Cansancio nakakuhag duha ka bulto nga shabu sa suspek nga ilang gituohang mastermind sa krimen.
Hinuon ngalan ilang gitago-an sanglit nagpadayon ang ilang operasyon batok niini.
Si Rey Putian, 26, ulitawo, silingan sa mga biktima nga nahinabi sa Sun.Star Superbalita, nagkanayon nga nanigarilyo siya diha sa daplin dihang iyang nakit-an ang tulo ka mga suspek, usa nga naglabay sa granada nagsul-ob sa t-shirt nga maroon, laing kauban nag-t-shirt og puti, nag-shorts ug nagsapatos samtang ang ikatulo wa na siya makamay-ong sa gisul-ob.
Human sa paglabay sa granada, ang tulo daling ningsibat hinungdan nga ilang gigukod uban si Dongdong, anak sa biktima ug ilang naabtan sa sementeryo sa Ludo ang naglabay sa granada nga nag-maroon ug nadakpan.
Ang suspek, dihang gipangutana nila ug sa mga silingan, nihimakak sa pasangil, apan tungod sa pagdugok sa ilang mga silingan ug sa ilang tinguha nga makit-an pa ang mga kauban niini, nakabuhi ug wa na gyud nila makit-i pa.
Ang kauban sa suspetsado nga nagsul-ob og t-shirt nga puti ug nag-shorts iyang nakit-an nga nisakay sa mini bus 28 nga nag-parking padulong sa lungsud sa Carmen diha sa may Traveler’s Inn, duol sa crime scene.
Nibalik siya sa ilang lugar ug gipahibawo ang mga pulis ningrespondi sa crime scene nga ang usa ka suspek nisakay sa mini bus.
Nadakpan hinuon sa hot pursuit operation sa kapulisan kay naabtan ang mini bus diha sa Mandaue si Cabang.