DSWD padayon nagtunol og ayuda sa katawhan

NAGPADAYON ang paningkamot sa Department of Social Welfare and Development (DSWD) kalabot pagpa-abot og ayuda sa mga nanginahanglan dinhi sa siyudad.

Sa nakalabayng mga adlaw lain-laing aktibidad ang gihimo sa ahensiya sa nagkadaiyang bahin dinhi.

Sa mensahe nga gipaabot ni Carmel Duron, Regional Information Officer sa DSWD XI nga sa nakalabayng Abril 26 gihimo ang paglusad sa Convergence Strategy sa Davao del Sur.

Sumala pa nga gi-presentar ang unod ug katuyuan sa convergence strategy nga gipatuman karon sa ahensiya, lakip na ang mga dakong programa ug proyekto nila. Dugang pa ang pagpa-abot og suporta sa Provincial Local Government Unit (PLGU) ug Municipal Local Government Unit (MLGU) sa maong katuyuan.

Ang aktibidad gitambungan nila Davao del Sur Governor Douglas Cagas, opisyal sa PLGU, PSWDOs, DSWD Regional Director Ester A. Versoza, DSWD XI SWAD Team, provincial convergence project coordinators, DSWD program focal persons.

Sa maong adlaw sab gihimo ang social pension lauching ug pay-out didto sa Bansalan ug Sta. Cruz Davao del Sur, lakip na ang sa Pantukan Compostela Valley.

Ni Duron, nga gipaila-ila sa mga beneficiary, molupyo sa dapit kun unsa ang programa, lakip na sab ang pagpanghatag og pinansiyal nga ayuda ngadto sa mga senior citizens nga napailawom sa programa.

Ang Social Pension Program for Indigent Senior Citizens of RA 9995 maghatag og P500 ngadto sa mapiling beneficiary, diin dakong tabang na sab kini sa inadlaw-adlaw nila nga panginahanglanon.

Mga napiling beneficiary mao sab kadtong wala magdawatan og pension gikan sa SSS, GSIS, uban pa.

Sa pikas bahin kagahapong adlawa gihimo ang rice subsidy orientation sa Grand Regal Hotel nga gitambungan sa nagkadaiyang opisyal sa ahensiya, LGUs ug uban pa.

Unod sa kalihukan mao ang pagpasabot sa importanteng probinsyon sa programa, pagtuki sa mga suliran nga posibleng maatubang samtang gipatuman kini. Luyo niini, gihimo sab ang MOA signing labot sa rice subsidy program tali mayor sa nagkadaiyang lugar dinhi.

Subay sa report nga gihatag na sa National Food Authority (NFA), ang pagpahigayon sa rice subsidy program ngadto sa naglisod nga banay ngadto sa DSWD.

Sumala pa nga ang lakang kabahin lamang sa mga paningkamot nga mapatuman ang reporma sa NFA.

Dugang pa nga ang rice subsidy program ipaagi sa conditional cash transfer program sa DSWD. (Rhona O. Goc-ong)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph