GISUBHAN sa lokal nga kagamhanan sa dakbayan sa Digos ang bag-ong nahuman nga Don Pedro Estrada Public Market didto sa dalang Estrada niadtong Miyerkules sa hapon.

Giakanyon ni Digos City Mayor Joseph Peñas nga P80 milyones ang gigasto sa lokal nga kagamhanan alang sa duha ka andana nga gambalay nga merkado.

Ang proyekto nidagan og 315 ka adlaw una nga gisugdan sa panahon ni kanhi mayor ug karon Vice Governor Arsenio Latasa.

Nitambong si Latasa atol sa pagbendisyon ug inagurasyon human mahiuli gikan sa iyang bakasyon didto sa Estados Unidos.

Si Bernardo Quipit Jr., City Economic Enterprise Management officer, nagkanayon nga nalipay sila og dako sa proyekto human madugangan na sab ang kita sa lokal nga kagamhanan tungod sa bag-ong merkado.

Matud ni Quipit nga abri na ang ilang buhatan alang sa buot nga mo-arkila og puwesto sa bag-ong merkado.

Gipasalamatan sab sa mga opisyal sa dakbayan ang pamilyang Estrada kinsa nidonar sa maong luna sa dugay nang panahon.

Gawas sa maong merkado, nagpadayon sab ang konstruksyon sa dakong merkado sa dakbayan didto sa karaang puwesto.

Buot ni Peñas nga mahimong hapsay ang puwesto sa mga maninda sa palengke aron mahatagan og saktong serbisyo ang katawhan sa siyudad ug mga silingang dapit.

Unang nahimong kontrobersiyal ang pagpatukod sa duha ka mga merkado human gikuwestyon sa mga dagkong politiko sa lalawigan ang kadako sa pundong gigahin alang niini.

Apan matud sa mayor nga niagi sa saktong proseso ang pagpatrabaho sa maong proyekto. (Dondon Dinoy)