SAMARAN ang lima ka mga tawo human gipamusil alas 10:00 sa gabii niadtong Miyerkules didto sa probinsiya sa Cotabato.

Mga samaron nailhan sa kapulisan nga sila Lanie Cobrador, Edward Visca, Domingo Cruz, Mark Arbe ug Archie Cobrador, mga molupyo sa Barangay Poblacion, Matalam.

Sa nahagpat nga taho gikan sa Cotabato Police Provincial Office, nasuta nga samtang naglingaw-lingaw ug nag-inom ang mga biktima sa usa ka tindahan duol sa ilang pinuy-anan, dunay duha ka wala mailhing suspek ang mibutho ug dayong namusil kanila.

Bisan kon dunay mga samad, mga biktima, lakip na ang tag-iya sa tindahan nga si Cobrador nakahimo pa silang midagan pagawas sa lugar ug nangayo og panabang.

Sa kahadlok nga maabtan sa mga tawo, daling misibat ang mga suspek sa wala matino nga direksyon.

Mga biktima daling gisapupo ug gidala sa Cotabato Provincial Hospital sa siyudad sa Kidapawan kinsa giingong anaa sa talandugong kahimtang.

Nasayran nga una nahitabo ang insidente, dunay gikalalis ang mga biktima nga laing grupo nga nag-inom sab sa maong tindahan apan miuna og gawas.

Nagtuo ang kapulisan nga mibalik ang grupo nga gikalalis sa mga biktima unya gipamusil sila.

Hinuon, kapulisan padayon sa ilang gihimong lawom nga imbestigasyon aron nga mailhan ang mga suspek ug masayran ang tinuod nga motibo sa pagpamusil. (EF)