PADAYON nga gisusi karon sa mga otoridad kon kinsa ang suspek nga nagdala og mga kagamitan sa paggama og bomba nga narekober sa usa ka lodging house alas 6:40 sa gabii niadtong Miyerkules didto sa siyudad sa Cotabato.

Sumala pa nga miresponde ang mga ginsakpan sa 7th Marine Battalion Landing Team (MBLT-7) ug sa Cotabato Police Office sa nadawat nga taho nga dunay usa ka tawo kinsa nag-check-in sa Notre Dame Lodging House sa Quezon Avenue apan dunay gibilin nga bag sud sa lawak ug wala na mobalik.

Nakuha sa mga personahe sa Explosive Ordnance Disposal Team sa MBLT-7 ug sa kapulisan sulod sa gibilin nga bag ang duha ka bala sa 60 mm mortar, lima ka bala sa M23 grenade launcher, usa ka bala sa 81 mm mortar, 2 ka cell phone, mga kuryente, 2 ka 9 volts battery, apil na ang duha ka kalibre .45 nga pistola.

Gikanayon ni Cotabato City Police Director Danny Reyes nga ila sab nga gi-imbestigahan ang usa ka Manuel Chua nga molupyo sa maong dakbayan human nga nakuha ang iyang voter's Identification Card sulod sa bag nga gibilin sa lodging house.

Apan gipangatarungan ni Chua nga dugay nang nawala ang iyang voter's ID nga posibleng napunitan sa mga dautang grupo.

Gibutyag ni MBLT commanding officer Colonel Jose Dorotheo Jalandoni nga una nila narekober ang maong mga kagamitan sa improvised explosive device (IED) dugay na silang nakadawat og taho sa planong pagpamomba sa mga terorista sa siyudad sa Cotabato. (EF)