MADUGOON og tugob sa aksyon ang masaksihan karong Dominggo atol sa pagpahigayon sa Fight Ground championship nga sugdan sa alas otso sa gabii diha sa Talamban Sports Complex.

Mga inilang martial arts experts sa Sugbo pinangulohan sa SOMA-Modern way of fight, moabot ngadto sa walo ka parisan ang masaksihan sa tibuok promosyon kansang mga protagonista gituohang makahatag og saktong kombati.

Sa main event, si Joerick “D’Viper” Rivera mopakita sa iyang kalantip ug kahanas batok ni Nelson Navarete, ang garbo sa Arcom.

Gipaabot usab ang laing mabulokon nga kombati nila ni James Joel “Spider” Serenio ug John Edu “The Excalibur” Torbiso.

Ang mokompleto sa pasundayag mao ang panagtakos nila ni Johny Coertes ug Edcel Julom, Ryan Limotan batok Denam Cabahug, Aguinaldo dela Fuente batok Jr. Boyonas, David Po vs. Jun Abayle, Roniel Epile vs. Jean Mark Omo ug John Dave Epile batok Jaspar Berdin.

Ang entrance fee magkantidad lang og P20.00.