GIREKOMENDAR sa Provincial Prosecutor’s Office and pagpasaka og kasong reckless imprudence resulting in homicide batok kang Medellin Mayor Ricardo Ramirez nunot sa kamatayon sa iyang alalay nga si Edilberto Abao. Homicide ang orihinal nga kaso nga gipasaka sa kapulisan batok kang Ramirez. Apan nasuta sa piskaliya nga aksidente lang ang pagpusil kang Abao hinungdan nga ila kini gipa-ubsan.

Nasuta nga iring ang gitarget ni Ramirez apan si Abao ang na-igo nga naghigda didto sulod sa merkado. Sa paa na-igo ang biktima apan namatay kini samtang gi-operahan didto sa lungsod sa Bogo. Puwerting kisi-kisi ni Ramirez sa dihang gikiha siya sa kapulisan. Iyang gitumbok si kanhi Cebu Provincial Police Office (CPPO) Director S/Supt. Erson Digal nga nagbutang-butang kaniya. Unya karon, kay gipasakaan man siya og kaso. Sa ato pa, namusil gyud siya.

NAMAKAK

Matod pa sa inpormasyon nga atong nakuha nga kini si Ramirez mahiligon kining mamusil og mga iro ug iring. Mao ni iyang praktisan gamit ang iyang air rfile ug armas de fuego. Luoy intawon ang mga hayop nga mapusilan niining Ramirez. Karon morag gigabaan na kini siya sa mga hayop nga iyang napusilan.

Puwerting pamakak aning Ramirez nga wala gyud kuno siya makapusil kang Abao. Dugay mitubag sa pasangil. Sa dihang ako kini siyang nahinabi sa akong tulumanon sa radyo, lagyo kaayo og lihay si Ramirez. Dili motubag ug motubay sa pangutana. Mosukwahi og iya. Iya pang gida-ot ang anak ni Abao nga maoy nasultihan sa biktima sa wala pa kini mamatay nga si Ramirez maoy nakapusil niya. Hala, tubaga na ang imong kaso, Mayor. 

DRUGAS

Drugas maoy motibo sa paglabay og granada sa usa ka carenderia sa Barangay Carreta niadtong miaging adlaw diin usa ka tawo ang namatay ug laing duha ang na-angol. Matod pa nga ang  son-in-law sa namatay maoy adunay atraso sa drugas. Mikuha og drugas sa druglord unya wala mo-remit. Kanang termino nga nanambling. Inosente intawon kadtong biktima. Igo lang napagan.

Drugas usab ang hinungdan niadtong manag-agaw nga nakit-an nalang patay sa barangay Taptap. Gipanigbas ug gipamusil ang mga biktima unya gisulod sa sako. Pastilan no kining drugas wala gyoy hinungdan. Kon dili ka mamatay sa paggamit, mamatay ka kay adunay sindikato nga mopatay kanimo kon aduna kay atraso.

(bobby@sunstar.com.ph)