`Utok’ sa pag-granada drug personality

NAILHAN na sa kapulisan ang mastermind sa paglabay og granada nga nikalas sa usa ka kinabuhi ug niangol og duha ka mga miyembro sa pamilya niadtong Miyerkulis sa hapon sa may Ponce 2 Barangay Carreta ning dakbayan sa Sugbo.

Kini maoy gipahibalo ni Sr. Supt. Melvin Ramon Buenafe, director sa Cebu City Police Office (CCPO) dihang nahinabi sa Sun.Star Superbalita nga usa ka certain “Iking” ang utok ug ila nang nailhan ang background.

Hinuon nagdumili siya sa paghatag sa tinuoray nga ngalan ni Iking nga usa ka drug personality nga nagpuyo sa lungsod sa Lilo-an sanglit nagpadayon pa ang ilang operation.

Si Buenafe niingon nga nakig-alayon na sila sa Cebu Provincial Police Office (CPPO) sa paggukod kang Iking, kinsa gikompirmar sa Lilo-an Police Station nga drug personality sa ilang lugar.

Malaumon siya nga madakpan ang suspek sanglit naglihok karon ang ilang mga sakop sa pagpangita niini nga ilang gituohang wa pa makabiya sa Sugbo.

Giklaro niini nga sa mga interview, una nang ni-angkon si Eldie Prisco Mahinay, 40, ulitawo, habalhabal driver, taga Sitio Cabangkalan, Barangay Jubay, nga ang granada gikan ni Alvin Cabang, 24, ulitawo, taga Sitio Fatima, Barangay Jubay, Lilo-an.

Wa molabay si Cabang sa granada ug gipasa kini niya hinungdan nga siyay nilabay niini ngadto sa karenderya sa pamilyang Natividad diin si Eduardo Natividad, 67, namatay ug naangol asawang si Roseta ug ilang apo.

Si Mahinay niangkon nga siya ra ang nakadawat sa P10,000 nga gihatag ni Iking, ingon man siya niangkon nga nabilanggo na kaniadto sa kasong may kalambigitan sa illegal nga drugas.

Si Buenafe, niklaro nga sulbad na ang krimen nga pagpanglabay’g granada sanglit nadakpan man nila ang duha ka mga suspek ug pasakaan kinig kasong murder ug frustrated murder.

Si Chief Insp. Romeo Santander, hepe sa City Intelligence Branch (CIB) nga nahinabi sa Sun.Star Superbalita nagkanayon nga ilang nailhan ang mastermind nga drug personality, ingon man address niini atol sa follow-up operation apan kalit kining nahanaw.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph