GIKOMPIRMAR sa Provincial Social Welfare and Development Office sa lalawigan sa Sugbo nga hangtod karon nawagtang pa ang 35 ka mga sinakong bugas nga giingong gikawat sa usa ka gwardiya sa Cebu Provincial Detention and Rehabilitation Center.
Ang gipasanginlan nga maoy nagkuha sa mga sinakong bugas mao si PG1 Antonieto Babor, acting assistant supply officer o rice custodian sa CPDRC.
Sa pasiunang imbestigasyon sa buhatan ni Ret. Cesar Veloso, Capitol consultant on peace and order/security nahibaw-an nga di lang kini unang higayon nga dunay gipangkawat nga bugas gikan sa house van sud sa CPDRC.
Basi sa ilang nahipos nga impormasyon, matag buwan giingong makit-an si Babor nga magdiskarga og sobra sa 20 ka mga sinakong bugas duol sa iyang panimalay.
Ang nangawagtang mga sinakong bugas gipagawas ni Babor gikan sa house van niadtong Abril 25 nga way written authority gikan ni CPDRC acting warden Algier Comendador o sa PSWDO.
Dugang sa imbestigasyon, gimandoan pa sa maong jail guard ang 17 ka mga inmates nga nadestino sa kusina pagdiskarga sa mga sinakong bugas gikan sa house van tungod kay giingong i-deliver niya kini sa Capitol.
Human mahibaw-i ni CPDRC assistant warden Pepito ang gibuhat ni Babor iya dayon kining gipasusi ug nahibaw-an nga wa gidala sa Kapitolyo ang mga bugas.
Diha-diha iyang gimando-an ang iyang mga sakop nga moadto sa Veterans Village sa Barangay Kalunasan syudad sa Sugbo diin nagpuyo si Babor ug didto nakit-an sa iyang mga sakop ang tulo ka mga sakong bugas nga gidiskarga gikan sa van.
Dihang gisukit-sukit si Babor sa iyang mga kauban, nitubag kini nga hinatag ni Gob. Gwen Garcia ang tulo ka mga sakong bugas.
Sa imbestigasyon, gitumbok ni Babor si Wilson Ramos sa PSWDO nga maoy nagmando kaniya paghatud sa 35 ka mga sinakong bugas sa Ecotech, Sudlon, Lahug apan kini hugot nga gipanghimakak sa naulahi.
Sa report sa Balitang Bisdak, nagmahay si Babor nga nituo dayon siya sa tawag sa lalaki nga nagpailang si Ramos nga maoy nagmando kaniya pagbuhat sa ingon.
Iyang gibutyag nga naandan na nila nga mo-deliver og bugas nga ulahi ra nga ihatag ang withdrawal form gikan sa PSWDO.
Sa kasamtangan girelibohan una sa puwesto si Babor nga anaa karon sa “floating status” samtang nagpadayon pa ang imbestigasyon.
Matod ni Marivic Garces, provincial social worker nga posibleng mag-atubang og kasong pagpangawat si Babor.
Sa report sa Balitang Bisdak, gusto ni Veloso nga ipaubos sa lifestyle check si Babor labi na ang pagsuta sa taho nga giingong dunay negosyo nga pagpamaligya ug bugas ang asawa niini.
Si Gob. Gwen Garcia nimando usab og imbestigasyon kabahin niini sa Committee on Discipline and Investigation.
Gusto niya nga manubag ang mga tawo nga nagpaluyo sa pagpangawat og mga sinakong bugas sa CPDRC.(Jericha Kimberly L. Romero & Ronalyn Therese A. Miranda-CNU Comm Interns Sun.Star Superbalita)