DUHA ka mga lalaki ang mitugpa sa tambalanan human sila gipangtigbas sa care taker sa Nehel Eatery nga ilang giimnan didto sa dalang Bajada, siyudad sa Davao niadtong Huwebes.

Ang insidente nahitabo sa alas 11:20 sa gabii nga miresulta sa pagkasamad nila Alfredo Librado, 24, nagpuyo sa Vista Verde, Buhangin ug Romeo Cruz, 30, carwash boy, nagpuyo sa Suwawan, Marilog District, ning siyudad.

Base sa imbestigasyon ni SPO2 Leo Daylino sa San Pedro Police Station, nasayran nga ang mga biktima gitigbas sa suspek nga nailhan sa pangalan nga Miguelito Samontina, 35, stay-in worker sa Nehel Eatery ug lumad nga taga Surigao del Sur.

Ang spot report sa kapulisan nagpahibalo nga nagkaaway ang mga biktima ug suspetsado niadtong higayona tungod kay giguba sa mga biktima ang microphone samtang nag-inom niadtong miaging semana didto sa Nehel Eatery.

Ang ilang panaglalis maoy nakapasuko sa suspek mao nga mikuha siya og sundang dayon gipangtigbas ang mga biktima mga mitugpa sila sa Southern Philippines Medical Center (SPMC).

Si Librado nakaangkon og samad sa iyang tuong nawong ug bukton samtang si Cruz naigo sa iyang likod ug ulo dihang gihapsan og hait nga sundang ni Samontina.

Human sa hitabo daling miikyas ang suspek, samtang ang mga kauban sa mga biktima nanimalos pinaagi sa pagbato sa Nehel Eatery.

Maayong pagkabuak sa mga butang sud sa maong balay patigayon mao nga nangayo og panabang ang mga trabahante ngadto sa kapulisan.

Sa paghiabot sa mga pulis sa nahitaboan sa krimen, ilang nasikop sila Richie Balayanan, 19, carwash boy, nagpuyo sa Barangay Sasa ug Ronaldo Mata, 20, nagpuyo sa Barangay 23-C Poblacion, ning siyudad.

Sila Balayanan ug Mata gipriso sa mga pulis didto sa San Pedro Police Station samtang gipangita sab sa kapulisan ang mga suspek. (AD)