USA ka lalaki nakutluan sa iyang kinabuhi human makahiagum og grabeng paso sa lawas human gilamoy sa kalayo ang ilang panimalay didto sa Purok 7, Barangay Poblacion, lungsod sa Compostela, Compostela Valley province, Huwebes sa gabii.

Nailhan ang biktima nga si Juvy Pogador, 37, molupyo sa dapit.

Sa report gikan Comval Province Police Provincial Office nasuta nga alas 6:40 sa gabii sa dihang gilamoy sa kalayo ang balay sa biktima.

Sumala pa nga atol sa sunog anaa sud sa panimalay ang biktima, wala na kini makagawas.

Gisuwayan pa og tabang ang biktima sa iyang pag-umangkon nga mao si Jason Siton apan naglisod kini og sud sa pultahan tungod nakakandado kini.

Kapulisan ug ka-bomberohan abtik nga miresponde apan wa na nila natabang pa sanglit paspas nga mikanit ang kalayo.

Gisusi pa karon sa kapulisan ang hitabo aron sayron kun may foul play ba o wala.

Samtang mga arson investigator mihimo sab og dugang pakisusi aron sutaon ang hinungdan sa sunog ug kinatibuk-ang damyos sa propedad. (Marvin Pineda)