Sakop sa BM-29 giluthang patay

DEAD on arrival sa balay tambalanan ang sakop sa Batang Mindanao (BM-29) human giluthang sa nagmotorsiklo niadtong Huwebes mga alas 11:10 sa gabii sa Carmen ning siyudad sa Cagayan de Oro.

Giila ang namatay nga mao si Claro Marasigan, alyas Monching, residente sa Zone-2, Carmen.

Si Senior Police Officer 2 Fernando Laspoña sa Police Station 4 sa Carmen nga nahinabi sa Sun.Star Superbalita niingon apil sa napusilan ang higala niining si Dan Mark A. Pacquiao.

Gisaysay niini nga nag-inom ang biktima kuyog ang pipila ka mga higala atubangan sa Carmen Market dihang kalit lang mi-backing ang usa ka kolor blue nga XRM motorsiklo sakay ang nakahelmet ug nagjacket nga duha ka lalaki diin ang backrider maoy nitira puntirya kang Marasigan.

Tungod kay midungan sa pagdangan si Pacquiao apil kining gipusil makatulo ka higayon sa iyang tiil nga bahin.

Si Marasigan daling nakadagana apan lima ka samad sa lain-laing bahin sa lawas ug sa fatal area naigo ang biktima hinungdan nahapla apan nakapangayo pa sa tabang.

Gani diriyot pa nga mabuak ang samin sa presintuhan sa mga pulis human niigo sa bala.

Tuod man daling narespondihan sa mga pulis ang hitabo apan abtik nga nakasibat ang mga suspetsado.

Gidali pagdala si Marasigan sa Jr Borja Memorial Hospital apan dead on arrival nga gideklarar sa doktor.

Luwas na sa makuyawng kahimtang ning panahona si Pacquiao nga anaa sa Northern Mindanao Medical Center.

Matud ni Laspoña nga si Marasigan giingong gawas-sulod na sa prisuhan, nag edad pa lamang kini og 10 anyos nagsugod na kini sa pagsige simhot og rugby, hangtod nga miapil-apil na sa pagpangawat ug mga pagpanguot.

Nilabayng bulan gipasakaan kini og kaso tungod kay nagbitbit ug hait nga hinagiban ug kadudahan ang lihok ug pipila lamang ka semana ang nilabay nakagawas ra usab kini sa prisuhan.

Samtang si Pacquiao apil gihapon sa napasakaan og kaso niadtong tungora kay higala man niini apan gipyansahan sa inahan sa biktima ug gigiyahan.

Giingong naangin lamang kini.

Ang kapulisan blanko pa sa pag-ila sa mga suspetsado apan daghan ang

nagtuong binuhatan na usab kini sa giingong grupong vigilantes.(Stephanie V. Berganio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph