HUMAN sa pakigkumbati sa iyang lung cancer, hingpit ng mitaliwan ang pinanggang anak sa Tuburan nga si Bise Gobernador Greg Sanchez. Siya mahinumduman sa mga Sugbuanon nga usa ka public servant, negusyante, brodkaster nga nagsugod sa kawad-on apan nahimong nagmalampuson sa natad sa pulitika ug negusyo.

Nagsugod isip usa ka pribadong contractor unya diha sa pakigsuod kang Inday Nita Cortes Da Luz nadasig ug na-enganyo usab sa pag-apil pagserbisyo sa gobiyerno. Miagi og pagkapangos ug mga kapakyasan sa pulitika apan pursigido gihapon nga midagan hangtod nga hingpit ng mibarog sa iyang kaugalingong mga tiil.

Mismo si kanhi gobernador Lito Osmeña kinsa atong ekslusibong nahinabi sa Tulumanong Alagad sa dyRF Radyo Fuerza, ang personal nga midayeg sa kadasig ni Greg sa pagbuhat sa mga butang nga alang kaniya makaayo alang sa katawhan. Niya pa nga bisan og aduna sila’y personal nga panagbangi nga miresulta gyud ngadto sa pagkasiak sa ilang panaghigalaay pero siya nakasabot nga kining maong mga panagsumpaki normal sa bisan unsang relasyon unya ang kaso nila ni Greg nagasukad sa managlahi nilang mga pamaagi sa pagpatuman ug pagpadangat sa panerbisyo ngadto sa katawhan.

Si Greg midaog sa iyang pagka bise gobernador bisan pa’g napilde sa maong piniliay ang iyang gubernatorial candidate niadtong higayona nga si Junie Martinez. Unya sila nagka-maayuhay og buot ni Gobernador Gwen Garcia hinungdan nga siya mikuyog na ngadto sa ilang linyada.

Apan kining maong alyansa wala usab magdugay kay mipili man si Gwen og laing kaparis sa pagka-bise gobernador, ang batan-on nga si Glen Soco. Pero kini giisip nga resulta sa pag-aslom na sa relasyon tali ni Greg ug ni Gwen kay nagsugod naman si Greg sa pagkuwestyon sa mga proyekto sa lalawigan sa Sugbo ug nag-una gyud niini ang kontrobersyal nga kaso sa pagpalit sa naglangoy sa dagat nga yuta sa mga Balili.

Aduna usab hinuo’y iyang kaugalingong mga sipyat, palpak ug kakulangan si Greg Sanchez sama sa ubang mga nangatungdanan apan ang nakaayo lang sa iyang kaso kay nakahigayon pa man siya sa pagbarog sa iyang gitouhang ensaktong baruganan ug wala na mobali sa iyang prinsipyo sa katapusang hugna alang sa katagbawan sa personal nga kapritso.

Tungod kay wala may magpabilin nato dinhi sa kalibutan kay kitang tanan ang lumalabay lamang ug mopauli man gyud sa yutang gigikanan. Hinaot pang mag bag-o na’g maghinulsol ang mga abusadong sungkaban kay kitang tanan sama kang Greg ang aduna may atong kaugalingong gikatakdang oras.