KON mapasar sa balay balauranan, mahihimong sunod tuig sugdan na sa Department of Education (DepEd) pagdugang ang ang-ang sa elementary ug segundarya.

Buot ipasabot nga imbis mogradwar o humanon sa bata og unom lang ka tuig ang elementarya, madugangan kini og usa pa ka tuig. Sa ato pa sa Grade 7 siya mogradwar.

Mao usab kini sa segundarya o secondary level. Imbis motapos sa fourth year adto na makahuman ang bata sa fifth year.

Maanindot ang katuyoan sa DepEd tungod kay gitumong kini aron paghatag og igong kalidad sa sistema sa atong edukasyon ug sa samang higayon mahisama kita sa ubang nasod nga aduna ug nakapahimulos sa international standards sa natad sa edukasyon.

Apan ang pangutana kon unsa ka andam ang atong nasod ug ingon man ang katawhang Filipino sa paghangop ning maong sistema?

Di nato malalis nga ang kinabag-ang hut-ong sa atong nasod anaa sa masa. Pipila sa atong mga kaigsuonan ang nagping-it sa tumang kalisod nga halos di na gani makapagradwar sa ilang mga bata sa segundarya.

Di nato mawahing ang kamatauran ang nagkadaghan na nga mga out-of-school youth o mga dropout students tungod sa kawad-on. Unsa pa kaha kon mapatuman na kining bag-ong balaod karon?

Ang pagdugang og laing ang-ang sa basic education nagpasabot nga aduna na usay laing duha ka tuig nga gastuhan sa mga ginikanan.

Tinuod nga mas bintaha kon mahisama kita sa ubang nasod nga nakahimo sa ingon apan angay usab gyud unta tun-an sa atong mga magbabalaod kon aduna ba kitay kapabilidad nga mosunod niini.

Maayo unta og ang gobiyerno na lang ang mogasto.