Angeling Gonzales Yburan
Suba Barangay Hall, Sto. Niño St., Cebu City
Gikulbaan gyud ko pag-ayo
Kinsa goy dili?
Hinuon dili ko bation og sakit
Kay di man ko indeksyunan,
Di ko samaran, dili disdisan –
Di sab ko pabilahon
Aron ang tinaguan lilion
Kon birhen pa ba ko o dili na!
Ihi ko ray eksaminon
Nga gisulod ko na sa garapa,
Kay di pa lang gayud dugay
Niining buntaga karon –
Midalikyat kog sulod sa CR
Ug gisawod ang igo ra
Nga maoy gikinahanglan
Sa batid sa laboratoryo.
Mao na ni ron! Mao na gyud ni!
Gipanubdan kog dagkong singot –
Kay ang resulta nga gitamdan ko
Tinuod gayud. Dili ikalimod!
Ug di na ni masulbad sa pagbasol!
Unsaon ko na lang. unsaon ko?
Dili pa ra ba ko andam
Sa pagsagubang sa kaakuhan –
Ug kining nagginhawa sa kahiladman ko,
Ipatuok ko ba ni sa kangitngit
O ihalad ko ba unya sa kahayag?
Kalibog ko baya. Naglibog gyud ko…
Kon unsay angay kong buhaton
Ning akong pagka biktima
Sa kaugalingon kong kahuyang!