DEAR Noy Kulas,

Ako si Leo, 27, taga Mandaue. Kining among problema sa akong pamilya nagsugod sa akong pagkaadik sukad pa sa uyab pa mi sa akong asawa. Six years mi nga uyab hangtod nga naminyo mi. Niundang na unta ko og bisyo usa ka tuig kapin, apan tungod sa among dapit nga naghitak ang drugas, nabalik ko sa bisyo. Ako wa sad gyud hinuoy laing bisyo kana ra gyud ang shabu. Kanang mag-away mi sigehan ko niya og ingon nga kutob ra sa lima ka tuig ang iyang pag-antos nako.

Wa nako gi-mind kay nagtuo ko nga joke ra niya. Pag-abot namo og lima ka mga tuig, nagsige gihapon ko sa akong bisyo. Nigrabe pa gyud kay mamaligya na man ko sa among mga butang kon wa koy kwarta aron ibisyo. Siya sad kay magsige na lang sad og inom kuyog sa iyang mga amiga. Ako na lang ang ni-surrender sa among bisyo. Ako siya gisigehan og hangyo nga magtarong na lang mi kay naa na miy anak. Five years old na ang among anak. Apan gibaliwa ra ko niya.

Niundang ko ug buotan na kaayo. Siya sige lang gihapon sa iyang inom. Magsige ko og hilak apan gibaliwa ra ko niya.Tungod sa akong bation nga kasakit ug kaguol nakahukom ko nga magbisyo og balik apan di na pareha sa una nga kada adlaw. Hangtod nga niabot gyud ang time nga ni-decision siya nga magbuwag mi. Wa gyud ko mosugot apan wa koy nahimo kay di naman siya makig-ipon nako.Wa gyud ko kadawat sa hitabo. One week ko nga magsige og hilak labi na kon mangita niya ang among anak. One month gyud mi nga wa nagkita bisan og text na lang.

Tungod ra sad sa among anak nagkita mi kay recognition man unya 3rd honor ang amoang anak. Ako siya nga gihangyo nga motambong lang ming duha. Nisugot ra siya. Nindot kaayo ang among panagkita kay maora lang mi og wala nagbuwag. Malipayon kaayo mi ato nga adlaw. Wa ra gihapon mi nag uli.

Sukad nga nagbuwag mi naka realize na ko sa tanan nako nga sayop, unsa ka importante ang pamilya. Focus na akong time sa akong anak kay kon wa pa ni akong anak, naghikog na ko. Gisalig na lang gyud nako sa Ginuo ang tanan. Mosimba na ko kuyog ang akong anak. Mag ampo mi kada gabii. Ang nakanindot ra ba kay hinayhinay na nga gihatag sa Ginoo, ang among pag-ampo sa akong anak.

Naa pa gyud kahay chance nga magkauli mi sa akong asawa nga final na man gyud kuno iyang decision? Tinuod na ang sukob nga double wedding man mi sa akong brother? Unsa ang maayo nako nga buhaton aron magkauli mi sa akong asawa? Salamat, Noy Kulas. God bless us always. To my wife: I LOVE YOU FOREVER.

MR. LEO

Mr. Leo,

Nindot kaayo panaminan sa mga amahan nga sama kanimo nagbisyo. Tinuod importante kaayo ang pamilya. Salig sa Ginuo ug pag-ampo kanunay.

Believe in Him kay ihatag Niya diha nimo. Ayaw pagdali nga mahitabo ni, pag-agad sa Diyos. Be thankful nga naa kay anak nga nagmahal sab nimo.

Naa pa sa kasuko diha nimo ang imong asawa mao nga kadtong ang iyang pag-inom iya tong bawos aron ka sab maka-feel sa iyang na-feel kaniadto. Sayop baya to iyang gihimo, apan pasaylo sab siya kay pareho mong duha nakasala. Ayaw pagtuo anang sukob. Bisyo ang nakaingon nganong naingon niana karon ang inyong pagpuyo. Biyai sa hingpit ang bisyo.

NOY KULAS