GIILA sa kapulisan nga ‘drug queen’ sa lungsod sa Balamban nasikop atol sa buy-bust operation niadtong Huwebes sa gabii sa gawas sa iyang panimalay sa Sitio Tubod, Barangay Pondol.

Si Charito Andong Villahermosa, 26, ug minyo, nakuhaan sa iyang posisyon sa duha lang ka pakite sa shabu, P7,390 mil cash nga gituhoang halin sa drugas, mga kagamitan sa paggamit niini ug P600 nga buy-bust money.

Si PO3 Cesar Climaco, desk officer sa Balamban police nga nahinabi sa Sun.Star Superbalita, nagkanayon nga ang ilang kauban nga Si PO1 Godofredo Dumdum maoy nagsilbing poseur buyer atol sa operasyon.

Matud niya nga unang transaksyon nga P100 nga shabu ang gipalit sa ilang mga kauban, dihang positibo nga dunay drugas gisundan gilayon sa pagpalit sa shabu nga nagkantidad sa P500.

Dihang gidunol ni Villahermosa, ang shabu dali kining gisignit hinungdan nga wa makalihok ang mga kauban niini sa panimalay samtang kadtong ubang mga customer niini ang daling nanghanaw sa lugar.

Sa impormasyon nga nakuha sa kapulisan, si Villahermosa pito na ka tuig nga nagnegusyo sa illegal nga drugas apan ‘on-nd-off’ lang kini.

Makabaligya usa ka gatos ka pakite matag semana, kon kusog ang halin niini, mokita og P10,000 - P12,000 matag adlaw sa iyang mga kustomer sa mga dagkong kompaniya diha sa Balamban ingon man sa ubang mga lungsod.