BILANGGOAN ang bag-ong pinuy-anan sa usa ka ginang nga giingong drug queen human nadakpan sa buy bust operation sa mga sakop sa Philippine Drug Enforcement Agency (PDEA-7) niadtong Biyernes sa alas 3 sa hapon sa Barangay Suba, dakbayan sa Sugbo.
Si Brigida Alemania Cagado, 54, lab-asirag isda apan giilang drug queen, nakuhaan og 58 ka pakiting shabu human nidunol sa P500 nga kantidad sa usa ka pakiting shabu ngadto kang Intelligence Officer 2 (IO2) Von Rian Tecson, kinsa maoy nagsilbing poseur buyer.
Si Intelligence Officer2 (IO2) Jelou Paca, team leader sa mga ahente sa PDEA-7 nga nipahigayon sa buy bust, nibutyag sa Sun.Star Superbalita nga si Cagado makabaligya og 200 gramos nga shabu matag semana.
Nakadawat sila og impormasyon batok niini pipila na ka mga buwan ang milabay gikan sa mga residente hinungdan nga gipa-ubos nila sa surveillance sulod sa usa ka buwan.
Si Tecson nga nahinabi sa Sun.Star Superbalita niingon nga namaligya og isda si Cagado sa ilang lugar apan sa ilang monitoring human nasutang nagpalusot kini og drugas.
Uban niya ang confidential agent, mipalit siyag P500 nga kantidad sa shabu sa balay ni Cagado.
Dihang gitunol dali niyang gisignit hinungdan nga wa na maka-kisikisi.
Sa ilang pagrekisa, nakuhaan pa kini og 57 ka mga pakite sa shabu sa iyang possession.
Ang usa ka pakite nga maoy dagko mokantidad sa P500 matag usa, samtang ang 47 ka gagmay nga putos nagkantidad sa P200 ang matag usa.
Gawas niini, nakakuha sab sila og upat ka mga resibo sa banko sa gidepositong duha ka tag P50,000 ingon man duha ka tag P40,000 sa miaging buwan ug karong buwana.
Ang gipadalhan sa kwarta ang usa ka babaye nga gikatahong maoy giangkatan ni Cagado sa illegal nga drugas.
Ang contact niini gikan sa Muntinglupa sa kaulohan ug dunay tawo dinhi sa Sugbu nga ginganlag “Bakang” nga maoy mohatag sa drugas sa suspek.
“ Usa si siya sa pinakadako diha sa suba. Drug queen ni. Lab-asirag isda pero 3 floors ang balay kay duna diay illegal,” dugang ni Tecson.
Nasuta sab nila nga ang suspek dunay kaso kaniadto sa illegal nga drugas nga kalapasan sa section, 5, 11 sa article ll RA9165 pipila na ka mga tuig ang milabay, apan gi-dismiss.
Si Cagado, nga nahinabi sa Sun.Star Superbalita mipatulo sa mga luha ug nipadayag nga nagmahay siya tungod sa iyang pagpamaligya niini.
Giangkon niya nga iyaha ang nasakmit nga drugas ug namaligya siya tungod sa kawad-on ug napugos kay patay na ang iyang bana.
Siya pay nagbuhi sa pito ka anak babaye, 14 ka mga apo, ingon man sa mga umagad nga way trabaho.
Ang drugas iyang gi-angkat gikan kang “Bakang” nga tag 25 gramos matag simana sa kantidad nga P24,000, nga iyang ipakuha sa iyang mga sinuhulan.