ANG City Investment and Promotion Office (CIPO) sa siyudad sa Digos nag-awhag sa katawhan nga di una mosaka sa Mt. Apo sanglit hugaw pa ang palibot sa bulkan hinimuan sa mga tawo nga misaka niadtong Semana Santa.
Si Edgardo Elera, opisyal sa CIPO, nagbutyag sa Sun. Star Superbalita nga ilang himuon karon ang clean-up operation sa Mt. Apo mao nga di nila tugotan nga mga tawo nga moagi sa siyudad paingon sa Mt. Apo.
"Ang among tuyo mao nga manglimpyo unta mi daan tungod
kay daghan kaayong basura nga nahibilin didto, pero kung mamugos gyud sila wa ta'y mahimo," ni Elera.
Mga basura sa maong dapit giingon nga gipangbilin sa mga iresponsableng mountain climbers bisan pa man nga hugot nga nagpahimangno ang Department of Environment and Natural Resources (DENR) nga di magsinagbot sa Mt. Apo.
"Gusto na gani namo mosaka karon aron manglimpyo pero hulaton na lang nga moabot ang mga bag-ong dump trucks sa city kay nabalaka si Mayor nga kung ang daan ang gamiton basin madaot," pahayag ni Elera.
Si Elera nagsulti nga buot nilang di una moagi ang mga tawo sa Barangay Kapatagan, siyudad sa Digos aron di madugangan ang basura sa maong lugar paingon sa Mt. Apo.
"Bisan unsaon nato og pahimangno naay mga gahi og ulo nga di motuman sa rules nga gipatuman," sulti ni Elera.
Suma sa opisyal, wawa silay igong gahom aron moduso og balaod nga magdili sa mga mountaineers nga moagi sa siyudad sa Digos.
"Ang atua na lang ani mahuman na mi paglimpyo ug ato silang awhagon nga tumanon na gyud ang pagbitbit sa ilang mga basura," ni Elera.
Niadtong Semana Santa, kapin 600 ka indibidwal ang nisaka sa Mt. Apo kinsa miagi sa dakbayan sa Digos.
Silang tanan giingon nga nangatarungan nga di nila madala pagpauli ang ilang mga basura tungod kay didto na moagi sila moagi sa lutsanan sa Sta. Cruz, Davao del Sur ug siyudad sa Kidapawan, North Cotabato. (Orlando B. Dinoy)