ANG napulo ka mga sakop sa Sarangani Public Safety Batallion ibalhin sa Regional Police Holding Administration Office (RPHAO) human sila gireklamo niadtong miaging semana sa napulo ka mga mananagat sa Ladol beach sa Kawas, Alabel, Sarangani Province.
Kini ang gikompirma ni Police Sr. Supt. Florendo Quidilla, Provincial Director sa Sarangani Provincial Police Office (SPPO) niadtong miaging adlaw.
Si Quidilla nagbutyag nga ang napulo ka mga pulis gidis-armahan sa ilang labaw ug mag-atubang sab og kasong administratibo ug kriminal sa Ombudsman ug Prosecution Office.
Matud ni Quidilla nga adunay namugnang Task Group nga gilangkuban sa mga imbestigador sa kapulisan sa probinsiya nga gipangulohan sa ilang Deputy Provincial Director for Administration.
Gipasalig usab nga dili sila mahimong bias sa himuong imbestigasyon tungod kay wala nila gitugutan ang pagpang-abuso sa kapulisan.
Ang napulo ka mga pulis gireklamo sa mga mananagat nga gipabuthan samtang nagpundo sila sa baybayon sa maong lugar.
Gibutyag sab ni PNP 12 Regional Director Chief Supt. Benjarde Mantele nga walay luna sa ilang organisasyon kadtong mga pulis nga abusado sa ilang katungdanan. (Edgardo Fuerzas)