Anol Mongaya
Panahom
rGreg Sanchez dihang gitudlo kini nga OIC board member kaniadtong 1986.
Gikuha man ko nga staff ni OIC board member Joeyboy Holganza ug lakip sa akong trabaho mao ang pagtambong ug pag-monitor sa mga sesyon sa Hunta Probinsyal.
Lahi sa mga sakop sa hunta karon nga kasagaran igo lang motando.
Ang hunta nga akong naabtan alegre kaayo kay halos tanan maningog ug di palupig sa mga debate.
Ug usa sa akong mahinumdoman nga aktibo mao kini si Bokal Greg Sanchez.
Tuod man, nahimo gyud nga bise gobernador siya sulod sa labing dugay nga panahon kon itandi sa ubang mga bise gobernador sugod sa 1986.
Subo lang palandungon nga sa kakusog niyang manigarilyo, lalim bay moabot kuno og walo ka pakete matag adlaw, wa gyud makasugakod ang iyang baga ug namatay siya tungod sa lung cancer.
Maayo gani si Bokal Winston Garcia, ang igsuon ni Gob. Gwen Garcia ug nahimong bosing sa GSIS sa panahon ni Presidente Arroyo, nakaundang pagsigarilyo. Di ko makalimot niadtong tungora dihang nabalita kini si Winston nga niingon nga mas mabiyaan pa kuno ang asawa kay sa sigarilyo.
Paglabay sa katuigan, napruweba nga mas gibiyaan pa ni Winston ang pagpanigarilyo.
Apan lahi si Greg kay grabi man kuno gihapon moyupyop bisan pa man og nahibaw-an na nga dunay kanser.
Bisan pa man, dakodako gyud ang agi ni Bise Gobernador Sanchez sulod sa iyang 69 ka tuig dinhi sa kalibotan.
DI NA KOMPLIKADO
Sa pagpanaw karon ni Bise Gobernador Sanchez, makaingon kita nga mas di na komplikado ang politikanhong kahimtang sa lalawigan.
Diha sa hunta probinsyal, nawad-an og lig-ong haligi ang oposisyon. Buot ipasabot, nawad-an og tunok ang mayorya nga makalihok na karon nga wa nay magsigig kyaw-kyaw.
Sa habig sa oposisyon, dako man og posibilidad unta nga modagan sa pagkagobernador si Sanchez kon lig-on pa kinig lawas ug mahimo kining problema sa lider sa Liberal Party nga si Junjun Davide.
Makaingon kita nga di na kaayo tantong komplikado ang politika sa lalawigan.
PAJERO
Ang desisyon sa korte nga ipauli ang Mitsubishi Pajero ni Ruby Bella Santos tungod kay lahi ang plate number nga gilista sa CIDG 7 sa ilang search warrant nagpakita lang nga di na makabastabasta sa pagsakmit ang kapulisan atol sa usa ka ronda.
Samtang mas daghan karon ang kumbinsido, basi sa ilang nakita sa dagan sa kaso nga kini gyud si Santos ug ang iyang uyab maoy sad-an sa pagdagit ug pagpatay kang Ellah Joy Pique, ubos sa mata sa korte, inosente pa kini sila hangtod nga mapamatud-an nga sila sad-an.
Buot ipasabot, kinahanglan pa gyud nga mapruweba sa mga piskal basi sa mga ebidensya nga nakuha sa kapulisan nga ang mga suspetsado mao gyud ang sad-an.
Buot ipasabot pa gyud nga di na mahimong magpataka lang ang kapulisan. Niining kaso ni Pique, atong nakita nga wa pa gyud makasulbad ang kapulisan sa krimen samtang kon di mahukmang sad-an ang mga suspek.
Di mahimong magpataka na lang gyud ang kapulisan aron lang makaingon sila sa publiko nga nasulbad na ang usa ka krimen.