GILANGAW ug nagmingaw ang katapusang adlaw sa gihimong recalibration, testing ug sealing sa mga taxi sa Sugbo sa Land Transportation Franchising and Regulatory Board sa rehiyon siyete kagahapon diha sa South Road Properties sa dakbayan sa Sugbo.
Si Ahmed Cuizon, regional director sa LTFRB-7 niingon sa Sun.Star Superbalita nga di lugwayan sa ilang buhatan ang pagpa-recalibrate, test ug seal sa mga metrohan sa taxi.
Sa pagkutlo ning balita, kapin pa lang sa 4960 ka mga taxi units gikan sa kapin 6,050 sa tibuok Central Visayas ang niagi sa nahisgutang proseso ug gitugtan nga makakolekta sa inusbawang pletehan sa taxi.
Kini nagpasabot nga kapin pa sa usa ka libo ka mga taxi units ang wa pa
magpa-recalibrate, test ug seal sa LTFRB-7.
Niadtong Enero, giaprobahan sa LTFRB Central Office ang bag-ong pletehan sa taxi nga P40 nga flag down rate ug dugang P3.50 sa mosunod nga patak apan kadto lang nagpa-recalibrate ang gitugtan nga makapaningil niini.
Si Cuizon nipasidaan sa mga drayber sa taxi nga dakpon sila ug pamultahon kon masakpan nga wa pa magpa-recalibrate sa ilang unit ug namasahero.
Ang masakpan nga drayber sa taxi pamultahon og P5,000 isip silot sa undercharging ug dugang P125 sa matag semana kon dili gihapon makapa-recalibrate sa iyang metrohan sa taxi.
Suma pa ni Ariel Yburan, precession instrument technician ug pangu sa resealing team sa LTFRB-7 nga kadto lang mga metrohan nga mo-isyu og resibo ang ilang i-recalibrate.
Matod niya moabot sa kapin 30 ka mga taxi ang dunay kwestyonabling prangkisa ang ilang nasakpan ug wa tugti nga ma-calibrate ang metrohan. SCG