UPAT ang nangaangol, duha niini mga bata, human ang usa ka 10 anyos nga batang babaye nga kalit lang nilabang sa karsada nadasmagan sa motorsiklo sa highway sa Barangay Don Gregorio Antigua, lungsod sa Borbon, Sugbo.
Si Perlina Tero, nagpuyo sa nahisgutang lugar, nalandig sa Vicente Sotto Memorial Medical Center (VSMMC) human nakaangkon og bun-og sa iyang ulo ingon man ubang parte sa kalawasan.
Samtang ang nakadasmag giilang si Ryan Quimque, 25, dunay kapuyo, taga Barangay Labangon, lungsod sa Tabogon, kinsa nalandig sa tambalanan sa lungsod sa Sogod.
Ang kapuyo ni Quimque, nga si Leonora Polasan, 19 ug anak nga si Zianlee, usa ka tuig, nakaangkog mga gagmay nga garas sa kalawasan atol sa disgrasya.
Hinuon sila luwas sa makuyaw nga kahimtang.
Si PO2 Rey Suson, desk officer sa Borbon police nga nahinabi sa Sun.Star Superbalita, nagkanayon ang managtiayon gikan sa dakbayan sa Lapu-Lapu kagahapon kay nagpatambal sa ilang anak.GPL