SI Ms. Olive-C Campus Model Philippines 2015 Princess Jayme miangkon nga nausab ang dagan sa iyang kinabuhi duha ka buwan human siya nakoronahan sa naasoyng nasudnong indigay sa kaanyag.
“Akong na-realize nga nausab ang akong priorities karon human ko makadaug sa Ms. Olive-C. Kinahanglan na nako balansehon ang akong oras sa pagtungha ug sa mga obligasyon isip bag-ong modelo sa Olive-C,” dason sa Sugboanong tinun-an sa Cebu Normal University.
“Kinahanglan ko motikang sa Manila matag karon ug unya kon aduna ko’y TV guesting, mall tour, campus tour, ug photo shoot sa kauluhan,” butyag sa 18-anyos nga dalaga.
Human siya makapirmag usa ka tuig nga kontrata, gisugdan dayon ni Princess ang iyang mga tulumanon isip Olive-C ambassadress. Nag-mall tour siya kauban ang lain pang mananaug sa Mr. And Ms. Olive-C Campus Model aron sa pag-promote sa Olive-C. Mi-guest usab siya sa The Master Showman’s Walang Tulugan, kauban ang dance group nga Good Vibes, ug na-interview ni star-maker German “Kuya Germs” Moreno.
Giasoy ni Olive-C big boss Jim Acosta nga daghan pang mga proyekto ang giaandam nila alang kang Princess. “Gipaniguro sa Psalmstre nga human sa ilang koronasyon, adunay mga proyektong itanyag alang sa among grand winners, tungod kay pinaagi niini, mahatagan og kahulogan ang ilang kadaugan,” ni Mr. Acosta.
Dinhi sa Sugbo, gilauman nga mohimog campus tour si Princess. Karong July 31, usa si Princess sa mga guest sa acquaintance party sa University of Cebu Maritime Education and Training Center isip judge sa search for OPM Singing Champion.
Gidapit ang mga estudyante sa ubang eskuylahan sa pag-apil sa disco party. Adunay ticket nga mapalit sa tag-P100. Kontaka lang si Ymard sa 0929-4736948 o 0933-0540577 alang sa dugang kasayoran. (PR/Rich M. Salibay)