Barrita: Shabu sud sa BBRC?

LABING menos 125 ka mga pakete nga dunay sulod nga gituohang shabu nasakmit uban sa mga drug paraphernalia atol sa usa ka surprise inspection niadtong Martes sa sulod sa Cebu City Jail nga gitawag nga Bagong Buhay Rehabilitation Center (BBRC).

Wa pa gyud diay mahunong ang pagyuhot og illegal nga drugas sa jail. Dugay na man kining maong suliran. Delikado nga ang BBRC tawgon na lang unya nga suyopanan center. Total ang mga binilanggo di na man mahadlok nga mapriso kay naa na man silang daan sa sulod.

***

Nitaho si City Jail Warden Maria Victoria Jimenez ngadto sa Police Coordinating and Advisory Council (PCAC) sa syudad sa Sugbo nga 124 sa mga pakete sa gituohang shabu nasakmit gikan sa usa ka binilanggo, si Erick H. Armenion, nga giditinir sa kasong paghupot og illegal nga drugas.

Nasakmit sab ang upat ka syringes, duha ka improvised tooters, usa ka improvised tattoo machine, usa ka martilyo, gunting, duha ka pliers, duha ka cable wire, duha ka pisi, napulo ka iron bars, 16 improvised nga kutsilyo, 20 ka disposable lighters ug uban pa. Lusot man ganing chainsaw ug billiard table, kana pa.

***

Wa na masurprisa si Cebu City Mayor Mike Rama sa pagkasakmit sa shabu ug ubang mga kontrabando sulod sa BBRC kay dugay nang nahibaw-an ang pagpayuhot og illegal nga drugas sa city jail.

Matod pa sa mayor, ang tahas sa bag-ong warden mao ang paglimpyo sa city jail.

“Mao bitaw na akong giingon sa bag-ong jail warden to show me your mettle so that I can recommend permanency if warranted,” matod pa ni Mike Rama.

Gidayeg niya si Warden Jimenez sa iyang gibuhat apan di pa ibalik ang allowances gikan sa City Hall sa mga jailguards kon di siya makapresentar og programa nga magseguro nga wa nay jail break ug illegal nga drugas sa city jail.

***

Giwarningan ni Cebu City Vice Mayor Joy Augustus Young ang mga contractors nga i-ban sila sa mga proyekto sa syudad kon magtinonto sila sa pagtukod og mga eskuylahan sa syudad.

Si Young, chairman sa City Council committee on education, niingong depektuso ang mga gitukod nga eskuylahan sa walo ka mga barangay - sa  Barangays Buhisan, Busay, Pamutan, Sibugay, Sirao, Sinsin, Toong, ingon man ang elementary ug high school building sa Don Vicente Rama School sa Barangay Basak.

Lakip sa mga depekto mao ang pagpangliki sa mga semento, paglubyok sa sawog ug pagtay-og-tay-og sa ikaduhang andana. Gikuha pang kabilya sa mga sementadong bong-bong.

Kinahanglang ipaayo ang maong mga schoolbuilding sa di pa kini ipagamit sa mga tinun-an kay simbako mahun-og unya ang maong mga eskuylahan.

Di lang kay i-ban ang mga contractor, ikiha gyud.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph