LALAKENG naguol sa iyang gihambin nga sakit human na-mild stroke ug na-nervous breakdown naghikog sulod sa ilang balay pinaagi sa paglaslas sa iyang pulso kagahapon sa alas 10:50 sa buntag sa Velpal, Phase 1 Barangay Pakigne, lungsod sa Minglanilla, Sugbo.
Luwason unta si Eliezer Peña, 27, ulitawo, sa mga pulis ug mga silingan apan nanirado siya sa gate sa ilang balay ug pultahan sa iyang lawas.
Nagdala pa gyud siya og kusilyo aron way makaduol kaniya ug mao ra sab kini ang iyang gigamit sa paglaslas sa iyang pulso.
Dihang siya naluya na, dali siyang gitabang ug gidala sa ospital apan paglabay sa pipila ka oras human siya malandig sa South General Hospital, namatay gyud siya.
Si PO1 Evie Espina, desk officer sa Minglanilla police nga nahinabi sa Sun.Star Superbalita, niingon nga sa wa pa mahitabo ang pagpakamatay kang Peña, giingong gipaalarma samtang nagdala og kutsilyo nga nakadugo ang lawas.
Usa ka Joseph Nellas, silingan niini, nangayog pakitabang sa police station human si Peña kusganong namugos nga mosulod sa ilang balay nga nipatidpatid sa ilang gate nga nagbitbit og kutsilyo.
Pwerti nilang hadluka nga nangayog panabang sa kapulisan sanglit way igong rason dihang nanghasi.
Daling niabot ang upat ka mga pulis sa Minglanilla ug naabtan nila si Peña diha sa gawas sa ilang balay, apan wa sila makasulod kay gisirhan niini ang gate.
Gikombinser sa mga pulis nga ihatag ang iyang kutsilyo ingon man estoryahon nila kon unsa may iyang problima ug dad-on sa tambalanan, apan nagmagahi ug nihana pa pagdunggab sa usa ka pulis.
Nisulod sa ilang balay ug nanirado sa main door dayon nideretso sa iyang lawak hinungdan nga wa makasulod ang mga pulis.