SUGDAN na sa Department of Interior and Local Government ang preliminary conference ug ang pormal nga imbestigasyon sa administrative complaint nga gipasaka ni anhing Bise Gob. Greg Sanchez batok ni Gob. Gwen Garcia ug ubang mga opisyal sa Kapitolyo.
Si Grecilda Sanchez-Zaballero, kamagwangan nga anak sa anhing bise gobernador maoy nipahibawo niini atol sa press conference nga iyang gipatawag kagahapon sa buntag sa buhatan sa Lacto Pafi sa dakbayan sa Sugbo.
Siya nahibong kon nganong hilom ang Kapitolyo bahin niini nga niadto pa lang Mayo 23, 2011 nahibaw-an nila ang maong imbestigasyon.
Ang marathon hearing magsugod karong Hunyo 6 sa alas 2 sa hapon ug Hunyo 7-9, 2011 gikan sa alas 9 sa buntag hangtud sa ala 5 sa hapon sa rehiyonal nga buhatan sa DILG-7.
Subay kini sa gipasaka nga reklamo ni Sanchez nga Accroachment of Legislative Powers, Grave Misconduct ug Abuse of Authority batok ni Garcia ug kaubanan ngadto kang DILG Secretary Jesse Robredo.
Apil sa imbestigahan sila si Provincial Attorney Marino Martinquilla, Provincial Administrator Eduardo Habin, Provincial Treasurer Roy Salubre, Provincial accounting officer-in-charge Emmanuel Guial ug Human resource officer Noli Vincent Valencia.
Si Sanchez nireklamo nga sukad nibiya siya sa One Cebu party ni Garcia niadtong 2009, gi-harass sa gobernador ang Vice-Governor’s Office.